Global IDD Day hman a ni

October 21, 2018 kha khawvel pumpuia Iodine tlakchham vanga harsatna dona ní, Global Iodine Deficiency Disorder (IDD) Day a ni a, Pathianni a nih avangin Mizoramah chuan hian nimin khan hman a ni.

Global IDD Day hi Ai­zawlah chuan National Iodine Deficiency Disorder Control Programme (NIDDCP) huaihawtin Synod Conference Hall-ah hun hman a ni a; NIDDCP state programme officer Dr Chawngthanchhunga'n iodine tlakchhamna awm dan leh a invenna, NIDDCP activity report leh programme vision chung­chang a sawifiah.

Dr Chawngthan­chhunga chuan, iodine tlakchham vangin mihring­ah harsatna hrang hrang a thleng thei tih sawiin, "A bikin nuin nau a pai lai hian nausen taksa leh rilru ṭhan ṭhat nan a pawimawh zual a, he hun hi naute thluak insiam lai hun a nih avangin iodine an tlakchham chuan rilru leh taksaah rualban lohna a thlen ṭhin. Chumi pumpelhna chu iodine chi ei hi a ni," a ti.

Inkhawma tarlan danin, Iodine Deficiency Disorder Control Programme hi kum 1962 aṭangin India ramah kalpui ṭan a ni a, Mizoramah chuan kum 1968 aṭangin hman ṭan a ni.