Mipuiin political party pahnihte An barakhaih dawn - Lalduhoma

Zoram Peoples Move­ment (ZPM) chief mi­nisterial candidate Lal­duhoma chuan nimin khan ZPM pisaa inkhawmah thu a sawi a; November 28, 2018-a Mizoram inthlanpuiah Mizoram mipuiin political party pahnihte an barakhaih dawn niin a sawi.

Lalduhoma chuan, Mizoram mipui tan chief minister an ni tih inhre lote rorelna hnuaiah Mizoram chu a awm rei tawh avangin party rilru a nat phah thu leh chu chuan Mizo khawtlang nun leh kohhran thlenga a nghawng thu a sawi a, "ZPM chuan party chief minister ni loin, Mizoram Chief Minister siam kan tum. Tun ṭum inthlanah hian Zoram mipuite'n party pahnihte an barakhaih dawn a ni," a ti.

ZPM chuan bána kaih (hand­holding policy) hmangin chhung­kaw tinte eizawnna pek an tum tih sawiin Duhoma chuan, "Congress sorkar chuan chhungkaw tam tak eizawnna tihtawp tumin, commercial vehicle-te dam chhung atan kum 15 bituk an siam a, ZPM a sorkar hunah he order hi kan sût dawn a, kum bituk awm loin, motor a fit chhung chu kan phalsak dawn a ni," a ti a; an tum dan chu commercial vehicle neitute’n hria se a duh thu a sawi.

Lalduhoma chuan, kohhran sikul leh English medium school-te chu changtlung leh tláwm zawka kalpui a nih theih nan sorkar budget aṭanga puih an tum thu a sawi a, "Privatisation hi zawi zawia kalpui kan tum rualin, sorkar sikul kan neihsate hi hlamchhiah chuang loin, tuna lumpsum leh adhod aided school-te leh secondary school-te hi provincialise vek kan tum ang. Zirtirtute thingtlanga transfer an nihin in luah tur an hmuh loh vanga harsatna an tawh hi ZPM chuan quarters a saksak vek dawn a, warned leave pawh an chanvo pangngai kan pe let ang,” a ti.

Eng sorkarah pawh chief minister-in mimal taka a vei leh a tuipui apiang a hlawhtling ṭhin tih sawiin Duhoma chuan, "Kum 30 chuang vei nei lo chief minister, vote zawn bak ngaihtuah nei lo kan hrawn. Brig. T Sailo khan eng nge a vei tih mipuiin kan hria, a hming lam rualin mitthlaah hydel project a lang nghal a, buh leh bâla kan intodelh theih nan leileta siam theih ramte a hmunah a tlawhchhuak vek a ni," a ti a; ZPM chuan an vei záwng leh tih dan tur an chian em emte chauh an aupui ṭhin niin a sawi.

ZPM CM Candidate chuan, MNF leh Congress sorkara hamṭhatna dawng turin an party-ah inpek phawt a ngai tih sawiin, "Champhai South Block MNF Conference-a MNF President thusawiah, an sorkar chuan party mite duhsak bik an nih tur thu a puang a. Congress President pawhin Bhavan-ah an party mi ni lo chu a thisen zawmpui pawh ni se eng atan mah a tih loh thu a sawi bawk a ni," a ti.