Kan sorkar chuan NLUP leh NEDP Kan sem leh dawn - Lal Thanhawla

Congress party pre­sident Lal Thanhawla chuan kumin inthlanpuia a dinna tur bial pakhat zawk, Champhai South bial chhunga Congress party mite nen nimin khan Champhaiah an inkâwm a; Congress party-in sorkarna an chang leh a nih chuan, NLUP mamawh an awm chhung chuan an sem chhunzawm zel dawn thu leh NEDP pawh an kalpui zel dawn thu a sawi.

Lal Thanhawla chuan, "NLUP hi a mamawh an awm chhung chuan kan sorkar chuan kan sem zel dawn a, NEDP hmangin kut hnathawktute kan ṭanpui zel dawn bawk. Heng hi mi dangte tana malsawmna nihna kawng a nihzia kan hre chiang a, chung lam duh záwng a nih bawk avangin miretheite khaichhuahna tur hi kan ti zel dawn a ni," a ti.

NLUP duh loa High Court-a khingtu TJ Lalnuntluanga nen Cham­phai South bialah an inkhing dawn tih sawiin, "Ukil Pu Lalramzauva, NLUP duh loa min khingtu nen bawk Serchhip bialah kan inkhing dawn bawk a. NLUP miretheite'n an dawn hua a khing duhtute hi chung lamin mal a sàwm ka ring lo," a ti a; NLUP chu miretheite ta, Pathian lam ṭang a nih avangin lei mite khin hneh chi a ni lo tih an hriat chian a ngai tih a sawi.

MPCC President chuan, kuta pawisawilote thisen kaite hnenah Pathianin Mizoram a dah a rin loh thu sawiin, "Hmui dawthei pu mite leh sum ngaina takte hian kan ram rothil an tikhawbáw zo vek a, an gaihna hre lote an nih avangin an kutah kan ram enkawl hna hi kan dah ang tih a hlauhawm," a ti.

Inthlana Congress vote-tute vangin Mizo­ramin hma a sawn ṭhin nia sawiin Lal Thanhawla chuan, "Ram rotling thawktute hi Congress sorkar zel a nih avangin ram ro thil ropui tak tak kan ramin kan neih mekte hi in vote chhuah a ni. Kan ram enkawl tur hian chung lamin Congress party a buatsaih mek a ni," a ti bawk.

Hrangturzo biala Cong­ress candidate Van­lal­awmpuii Chawngthu pawhin thu sawiin, Champhai South bial chu Lal Thanhawla an chan avangin vannei a tih thu a sawi a, "Bial dang zawng zawngte'n an duh em em leh CM bial nih chak ngawih ngawih bial tam tak zinga Champhai South-in in chang thei hi ka lawmpui em em che u. Thil tih theih loh tiam ṭhintute leh inthlan dawn chauha ruhro politics khela ram tana martarte hmangaih thar ṭhinte politics hi mipuite'n kan thliar thiam a pawimawh," a ti.