KHAWTHLIR

DC-in tlangzarh
Sorkar laipuiin naupang kum hnih hnuai lam leh nu nau paite'n hri danna an lak vek theihna tura duan Mission Indradhanush chu Champhai district chhunga kalpui ṭan theih turin nimin khan CMO conference hall-ah Champhai DC Dr Naveen Aggarwal-i'n a tlangzarh. DC chuan, an district chhungah Mission Indradhanush hlawhtling leh huam zau thei ang bera kalpui a nih theihna turin thawktute duhsakna a hlan. Mission Indradhanush hmang hian naupang vaccine la lo leh la kim lote bakah nu naupaite tetanus toxoid/sakawr êk hrik danna pek vek tum a ni.

Lawngtlaiah training
November 28, 2018-a MLA inthlan lo awm tura Lunglei district-a duty tur zawng zawngte tan nimin khan DC conference hall-ah postal ballot hmanga vote thlak dan zirna buatsaih a ni. Training-a kalte hnenah form 12 sem chhuah a ni a, a hmunah dah khatin an thehlut nghal. Election duty tur, mahni awmna polling station-a vote thlak thei lo turte chuan nodal officer hnen aṭanga form 12 lak chhuah leh thehluh theih reng a ni.

Delhi Police
Delhi Police Recruitment Board chuan Mizoram mi leh sa dik takte tan Delhi Police constable (executive) mipa 44 leh hmeichhia 21 an la dawn a; dilna form chu October 25, 2018 tlai dar 5 thleng hian Mizoram Police website - www.police.mizoram.gov.in aṭangin lak (download) theih a ni. Dilna form fill-up chu Temporary Delhi Police Recruitment office, tuna DIG (Hqrs) Office, Police Headquarters, Khatla, Aizawlah October 25 tlai dar 5 thleng thehluh theih a ni. Physical test, written test leh medical test chu Mizoramah vek tih tur a ni a, mipa kum 18-21 leh hmeichhia kum 18-25 tan dil theih niin, Mizo (ST)-te tan kum 5 ngaihhnathiam a ni.