Thawhhona Thuthlung zâwm turin MPF-in party tinte a ngen nawn

Mizoram People Forum (MPF) general headquarters chuan nimin khan thuchhuah siamin, MPF leh political party tinin Thawhhona Thuthlung bawhchhia an awm chu pawi an tih thu an tarlang a; Thawhhona Thuthlung chu zâwm turin political party tin an ngen nawn.

MPF chuan, inthlanna fel, thianghlim leh dik a awm theih nan theihtawpin MPF-in hma a la ṭhin a, kumina MLA inthlan turah pawh political party hrang hrangte nen vawi eng emaw zat inhmukhawmin, Thawhhona Thuthlung siam a nih thu an tarlang a ni.

Thawhhona Thuthlung 2:4-ah chuan, 'Mipui vantlang tana ruaiṭheh leh pinic hi a hautak êm avangin tih loh ni se,' tih a nih thu sawiin MPF chuan, "He Thu­thlung bawhchhiatna nia lang Hrangturzo constituency-ah leh Aizawl East-II consti­tuency chhunga a thleng hi pawi kan ti. Kan Constituency Forum leh Local Forum hruaitute hmalakna hi ṭha kan ti a, kan thlawp tlat a ni. Hetiang thil hi Mizoram chhung khawi hmunah mah thleng tawh lo se kan duh hle," an ti.

MPF chuan, hmun ṭhenkhatah political party ṭhenkhatin sum an chelek nia sawi a awm thu sawiin, "Thawhhona Thuthlung bawhchhiaa party flag, banner leh poster tarte pawh a awma sawi a ni a, heng thilte hi ṭha kan ti lo a, a ṭul anga bawhzui zel a ni dawn," an ti. Thawhhona Thuthlung chu MPF leh party hrang hrang hruaitute siam a ni tih sawiin, "Party hrang hrang President leh MPF President-te hming ziak hnan a nih avangin zah a, zâwm theuh turin political party zawng zawngte kan ngen nawn leh a ni," an ti bawk.