IPR Director leh MJA-te inkâwm

Nimin khan Cham­phaia IPRO pisaah IPR director David L Thang­liana, MJA general head­quarters hruaitute leh Cham­phai district MJA member-te an inkâwm a; David L Thangliana chuan, Mizoramin inthlan­pui a hmachhawn mekah media mite'n an nihna leh chanvo dik tak pho chhuaka hlen chhuak turin MJA member-te a sáwm.

Inkawmhona hi Champhaia IPRO Dr Lallawmkima'n a kaihruai a; IPR Director chuan, MJA member-te puala tour buatsaih tur leh district tin puala infrastructure site visit ruahman fel tawh a nih thu sawiin, "Inthlanpui neih zawh veleh heng programme duan sate hi kalpui nghal a ni ang," a ti a, MJA motto - 'Service to the people' tih a nih angin, mipui leh sorkar inkara palai hna thawktu pawimawh an nihna hlen chhuak turin a chah a ni.

MJA Gen.Hqrs. president Zonunsanga Khiangte pawhin thu sawiin, MJA member-te thawhhona ṭha tak nei chunga mipui rawngbawl hna an kalpui ṭhin chu lawmawm a tih thu a sawi a; India ram state hrang hrangah journalist-te tan pension schemne kalpui mek a nih angin, Mizoramah pawh MJA member-te tan retirement scheme neih ve theih dan tur ruahmanna kalpui mek a nih thu a sawi bawk.