Plastic sâwngbâwl dan tur sawiho

Chite luia plastic hnawmhnawk lut thenfai dan tur leh sâwngbawl zui dan tura thutlukna siam tawh bawhzui dan tur nimin khan Chief Secretary pisa conference hall-ah secretary Lalnunmawia Chuaungo hoa rêl a ni.

Meeting-ah hian, PWD-in DPR an siam pahnih, ‘Solid Waste Management of Aizawl City: Integrating Plastic Waste in Road Con­struction’ tih leh ’Solid Waste Management of Aizawl City: Conversion of Solid Waste into Square Bales for Retaining Wall and Backfills’ tihte chu thlirho a ni a; DPR-te ngun zawka enho a nih hnuah bawhzui dan kawng zawn ni se, an ti.

Meeting-a tarlan danin, meeting hmasain plastic hnawmhnawkte PWD-in kawng siamna atan hman dan kawng zawng se an lo tih chu zir chian a nih hnuah, kawng siamna atan plastic hnawmhnawk nazawng a hman theih dawn loh avang leh, plastic hnawmhnawk 10% bak hman theih a nih dawn loh avangin Aizawl khawpui harsatna sutkianna tak tak a tling zo dawn loa ngaih a ni.

Tun dinhmunah plastic hnawmhnawk thlan bik ni lo, a zavaia hman ṭangkai theihna tur kawng zawn ṭula hriain, chumi atan chuan plastic hnawmhnawkte chu nem muk (compress) a, lung anga ṭangkai taka hman theih dan tur ngaihtuah ni se tih a ni. He project hi UDPA department project kal lai nen suihfin dan kawng zawn an remti a; bawhzui turin Save Chite Lui Coordination Committee leh Mizoram PWD-te ruat a ni.