Inthlana hriat tur pawimawh hrang hrangte
November 28, 2018-a Mizoram Legislative Assembly General Election atana expenditure monitoring chungchangah leh thamna sum pek leh lak leh, invauna kaihhnawiha political party, candidate-te leh anmahni puitute hriat tur pawimawh hrang hrangte district hrang hrangah tihchhuah a ni tawh. Hriat tur pawimawh tlangpui chu a hnuaiah hian tarlan a ni.
SUM HMAN/VAWN CHUNGCHANG
* Candidate pakhatin campaign nan Rs. 20,00,000 (nuai 20) a hmang thei.
* Election Expenditure pualin candidate-te'n bank account thar an hawng tur a ni a, a tlai berah nomination file hma ni khatah a hawng hman ngei tur a ni.
* Candidate-in a sum hman tur zawng zawng bank account tharah a dah lut vek tur a ni.
* Candidate-in election hun chhunga mimal pakhat emaw, pawl pakhat emaw hnena sum fai (cash) a pek chhuah pumpuiin Rs. 20,000 a pêl tur a ni lo. Hei hian mi pakhat/pawl pakhat chauh hnenah a pe thei tih a kâwk lo.
* Candidate-in a campaign nana sum a dawnin, Rs. 20,000 aia tam a nih chuan cheque hmangin, a account kaltlang chauhin a dawng thei ang.
* Candidate emaw, a agent emaw, a campaigner-te emawin Rs. 50,000 aia tam sumfai (cash) eng lai mahin an keng tur a ni lo.
* Election expenditure-te hi uluk taka vil (monitor) tur a ni a, a vil turin team hrang hrang - flying squad, surveillance team, static surveillance team, video viewing team, accounting team, media certification & monitoring committee, complaint monitoring control room & call centre, expenditure observer leh assistant expenditure observer-te an awm dawn. Anni bakah returning officer-te leh district election officer-te an awm bawk.
* Candidate-te'n an sum hman dan ziah luhna turin register pathum - Day to Day Account Register, Cash Register leh Bank Register-te an vawng tur a ni a; account-te chu campaign hun chhungin election observer-in vawi thum a endik ang. Final account chu election result puan aṭanga ni 30 chhungin DEO hnenah thehluh tur a ni a, thehluh hmain expenditure observer hoa reconcilliation meeting neih ngei a ngai.
* Candidate sum hman danah emaw, register a vawn danah thil fel lo a awm tih hmuhchhuah a nih a, thil tih dik lo chu siam rem (reconcile) theih a nih loh chuan inthlannaah tlinga puan tawh pawh ni se, Representation of People Act, 1951 Section 10A hmangin tling loa puan leh theih a ni a, kum thum chhung inthlanah chuh thei loa phuar theih a ni bawk.
* Candidate-ten rally emaw, public meeting, etc. buatsaih phalna an dilin, expenditure plan an thehlut tel ngei tur a ni. Rally/public meeting reng reng hi uluk taka vil vek a ni dawn.
* Expenditure monitoring team eng pawh chungah candidate-te an lungawi loh a, an chungah dan baka chea an hriat chuan district nodal officer hnenah an thlen thei.
THAMNA LEH INVAUNA CHUNGCHANG
* Indian Penal Code (IPC) Section 171B angin, vote hmuh nana inthlan laia sum leh pai leh eng thil pawh petu leh dawngtu chu kum khat chhung lung-in tàn emaw, pawisa chawitir emaw, a pahnih emawa hrem theih a ni.
* IPC Section 171C angin mi vautu emaw, engti kawng pawha mi dang tinatu chu kum khat chhung lung-in tan emaw (mi taksaah hliam a thlen chuan IPC section dang hmanga hrem theih a ni bawk), pawisa chawitir maw, a pahnih hmanga hrem theih a ni.
* Mi dang hnen aṭanga thamna sum la emaw, mi hnena thamna sum petu emaw, mi dang vautu leh tinatu laka thubuai siamsaka action la turin flying squad leh expenditure monitoring team dangte din a ni.