Ramri véngtu tur Scout Battalion din dawn

Sorkar laipui chuan India hmarchhak state pahnih - Meghalaya leh Mizorama ram dang mi (foreigner) lut ru veng tur leh sorkar phal loh a rûka la lut ṭhinte veng a, thuneitu sang zawk hnena thlentu tur Scout Battalion pathum a din dawn tih a puang. Battalion pathumte din dan tur ruahmanna kimchang chu Ministry of Home Affairs (MHA)-in a la siam leh ang.

Sorkar laipui chuan, India hmarchhak state pahnih Meghalaya leh Mizoram chu ram páwn aṭanga sorkar khap thil tawlhrûkna kalkawng a ni tiin, sipai leh police-te puitu tur Mizoramah Scout battalion pahnih leh Meghalaya-ah battalion pakhat din a nih tur thu a puang a; battalion-te chu Ministry of Defence leh MHA kutah an awm dawn a ni.

Scout battalion pathum bakah, Ministry of Environment & Forest chuan ram ngaw leh nungcha cherêu mekte veng turin sipai bángte chhawr zuina tur Mizoram leh Meghalaya-ah Infantry Battalion TA (Ecology) din turin ruahmanna a peih tawh.

Sorkar laipui thu­chhuah chuan, heng battalion thar din turte hi ram venhimna kawnga thawktu pawimawh tak an nih rualin, ṭhalaite leh sipai bángte tan eizawnna nghet zawk a siamsak dawn tih a tarlang.

Ministry of Defence nena inremna neia thawk dun mek ASC Training Centre, Bangalore chuan mipa naupang football khel thiam kum 8-14 inkar-te chu Boys Sports Company-a zir tur thlanna a nei dawn bawk a; he zirna hmunpuia zir tur thlante chuan engkim a thlawnin an dawng dawn a, English medium school-a kaltir an ni ang.