Nuai 100 eia Speaker puh vangin Session aṭangin eptute an chhuak ; 'Mi pawisa nâia khat mah ka la lo' - Speaker

Ngaizawl khaw kawng laihnaah Assembly speaker Lalrinliana Sailo-in cheng nuai 100 a ei nia sawi a nih avang leh, chumi avanga Assembly session kaihruai lo tura House leader Zoramthanga, chief minister an ngenna a hlawhtlin loh avangin eptu MLA-te chu nimin khan session-ah an tel lo. Hetih lai hian, Lalrinliana Sailo chuan, mi pawisa nâia khat mah a lâk loh thu a sawi.

Nimina Assembly session ṭan hnu, member thite sûnna hun hman dawnah ZPM Legialature Party (ZLP) leader Lalduhoma ding chhuakin, session-a an tel dawn loh chhan a sawi a, "Hlim takin ro kan rélho leh dawn emaw kan tih laiin, tun hnai maiah Ngàizáwl khaw kawng laihnaah cheng nuai 100 zet i lo ei ve a ni tih chiang taka sawi thâwmte kan han hre ta a. Hei hian Ngaizawl khaw mipui rilru leh Zoram mipui rilru a tina em em a, a pawi kan ti tak zet," a ti.

Lalduhoma chuan, "He House zahawmna hi tihbawrhbàna a awm loh nan leh nangma (Speaker) tan ngei pawh he House i kaihhruai loh hi a mawi zawka kan hriatsak che avangin kan House Leader hnenah kan thehlut tawh a. Chuvangin, he House zahawmna hi vawn nun zen a nih theih nan leh, he kan ngenna min hnâwlsak avanga kan lungawi lohna lantir nan keini chu kan lo chhuak ang e," a ti a; ZLP leh Congress Legislature Party (CLP) member-te chu House aṭangin an chhuak a ni.

Eptu member tam zawk an chhuah hnuah speaker Lalrinliana Sailo chuan puh a nihna chu a sawifiah a; Ngaizawl chu a bial hlui a ni tih sawiin, "Ka hun lai khan ka vannei a, PWD-te nen kan thawkho ṭha a. Vangtlang kawng siamna tur pavement te, Riangtlei kawng laih tharna tur te, Tlangpui panna te, Tlangpui-Khawlaikung panna te, Khawhai-Lungtan kawng tih ṭhatna tur te, Khawzawl-Hmuncheng te, Khawzawl-Tualpui, Khawzawl-Ngaizawl, Khawzawl-Neihdawn te kha ka nawr chhuak ve a, ka lawm khawp a. A vaiin cheng vbc. 82 chuang tiin an chhût," a ti.

Lalrinliana Sailo chuan, kawng siam tur chu a bialte'n pakhat mah kan thawh ve loh chuan, tiin an thawh ve theih nan pui turin an ngen tih sawiin, "Ka nawrpui ve ngei mai. Member zahawm takte hi ka'n sawi duh chu, Pathian khawngaihnain mi pawisa naia khat mah ka la lo tih hi ka sawi duh a ni," a ti a; Lungtan leh Khawhai chu a khua a nih thu sawiin, kawng siamna hmunah ngei eptu member-te chu kal se a duh thu a sawi.

Assembly Speaker chuan, "Kawng ṭhatna turin kan thawk tlang a, kan CM zahawm tak pawh ka ngen a. Lungtan leh Khawhai inkar khi an thawh percentage tunah hian Ngaizawl leh Khawzawl inkar ai khian a chhe zawk a ni. Ka pianna khuate a nih avangin ṭhahnemngai takin opposition group ṭhenkhatte kha ka'n support a nih chu," a ti.