Speaker chhui turin Lokayukta ngen

Ngaizawl khaw kawng siamnaah Assembly speaker Lalrinliana Sailo-in cheng nuai 100 a la nia sawi chungchang chhui turin ZPM party chuan nimin khan Lokayukta-ah ngenna an thehlut.

ZPM thuchhuah chuan, "Legislative Assembly speaker Pu Lalrinliana Sailo chu tun hnaia Ngaizawl NGO Coordination Committee leh VC thuchhuah te, Ngaizawl khawtlang hruaitute leh Pi Coleen Lalsangpuii leh a manager-te inkawmhona audio voice record aṭangin PMGSY kawng siam hnaah dan kalhin a inhnamhnawih ngei nia hriain, chhui chiang tura ngenna Lokayukta-ah kan thehlut. Lehkha hi Pu C Lalsawta, chairperson, Mizoram Lokayukta-in a lo dawng a ni," a ti.

Assembly Speaker chungchang chu Governor sawipui an duh avangin sawipui tura ngenna Governor secretary V Lalsangliana hnenah an thehlut nghal tih an tarlang bawk.

ZPM chuan, "Mizoram Assembly speaker Pu Lalrinliana Sailo hi heng thil dik lo aṭang hian a fihlîm a ni tih fiah a nih hma chuan Assembly House zahawm tak kaihruai lo turin ZPM party chuan kan duh a, kan MLA-te dinna hi kan thláwp tlat a ni," an ti.

Lokayukta leh Governor hnena lehkha thehluhnaah hian ZPM general secretary pathum - SL Ngursailova Sailo, Vanlalsiama Pachuau leh C Lalthanfela leh, secretary KJ Lalbiakngheta te an kal a ni.