Chakai farm siamna atan SEDP aṭangin Cheng nuai 57 min pe - Fisheries Minister

Fisheries minister K Lalrinliana chuan, Kolasib district-a chakai farm siamna atan SEDP aṭangin cheng nuai 57 hmuh a nih thu Assembly House a hrilh a; chakai farm chungchangah social media-ah dâwt thehdarh a nih thu a sawi.

Minister K Lalrinliana chuan nimin khan MNF member Zothan­tluanga zawhna chhangin, kum 2020-21 chhung khan Mizoram­ah sangha notê nuai 90 thar anga chhut a nih thu House a hrilh.

BJP member Dr BD Chakma leh MNF member Lalrinsanga Ralte te zawh belhna chhangin K Lalrinliana chuan, Dumlui, Kolasib district-a chakai farm chu la buaipui mek a nih thu a sawi a, "Kan la zo lo. Tuikhuah siamte kan la zo lo a, siam mek a ni," a ti.

K Lalrinliana chuan, social media-ah David Sailo tih leh mi dang dang, anmahni zawn chhuah hleih theih loh leh tute nge an nih hriat lohte'n thu dik lo an thehdarh ṭhin thu sawiin, "Chakai farm hi estimate cost cheng nuai 547 a ni an ti a, pakhat Rs 9,000 man a nite an ti a, chakai man tote an ti a, " a ti a; chutianga titute chungchang chu Fisheries department hotute nen an sawiho thu leh FIR thehluhte pawh an sawi thu a sawi.

Fisheries Minister chuan, chakai farm chu enchhinna a nih thu sawiin, a siam nan SEDP aṭangin cheng nuai 57 an hmuh thu a sawi a, "SEDP aṭangin cheng nuai 57 min pek laia nuai 500 chuang anga dâwt an thehdarh vak mai hi a pawi," a ti.

Chakai farm-ah chuan dil (pond) pathum a awm thu sawiin Minister chuan, "Aifiar te, aikamte kan ram chakai khawi kan tum. Pond kan siam chhungah khawi chhin ila, a inthlah pung thei em, a puitling thei em tiin kan khawi," a ti a; cheng nuai 36.97 an hmang tawh a, nuai 20 hman lohin a la awm tih a sawi.

K Lalrinliana chuan, India ramah chakai farm a la awm ngai lo nia sawiin, "Enchhinna a nih avangin ICR-te nen mithiamte nen ṭanghoin, zir chianga buaipui a ni a, ICR scientist-te pawhin vawi thum lai department mithiamte nen an enho tawh," a ti a; a hlawhtlin ngei theih nan theihtawp an chhuah thu a sawi bawk.