KHAWTHLIR

Motion of thanks House-ah pawm
Nimin khan Assembly session-ah session ṭan ní, February 22-a Governor thusawia lawmthu sawina motion pawm a ni. Motion of thanks hi MNF member K Laldawngliana'n a pu lut a, pawmpui turin member-te a sáwm. Rorel lai member eng emaw zat leh eptu member Dr BD Chakma ten an sawiho hnuah pawm a ni a; sawihona leh pawm a nih laiin INC leh ZPM member-te an tel lo.

HIV/AIDS vei tawh zat 25,358
Health & Family Welfare minister Dr R Lalthangliana chuan nimin khan Vanlalhlana zawhna ziaka chhangin, Mizoramah November 2021 thlengin HIV/AIDS vei mi 25,358 hmuh a nih tawh thu te, HIV/AIDS vei thi zat ART Centre-a dawn tawh zat chu mi 3,364 an nih thu te, HIV/AIDS vei enkawl lai mi 12,215 an awm mek thute a tarlang.

Nikum May thla atangin hlawh la lo
Higher & Technical Education minister Dr R Lalthangliana chuan nimin khan INC member Zodintluanga Ralte zawhna ziaka chhángin, RUSA hnuaia Mizorama assistant professor-te'n April 2021 thleng hlawh an la a, May 2021 aṭangin hlawh an lâk tawh loh thu a tarlang a, "Hlawh an lak theih loh chhan hi Mizoram state-in matching share a pek theih loh vang a ni lo," a ti.

MZP-in ngen
MZP Gen. Hqrs hruaitute chuan nimin khan Power & Electricity engineer-in-chief Lalduhzuala Sailo a pisaah an kâwm a, HSLC leh HSSLC exam chhungin power supply a khaihlak loh nan hma la turin an ngen. Lalduhzuala Sailo chuan, chhiatna a thleng a nih loh chuan exam chhungin power supply a khaihlak loh nan theihtawp chhuah an tum thu a sawi.

Punkhawm khap
Aizawl DC Dr Lalhriatzuali Ralte chuan, Assembly session neih mek tluang taka neih a nih theih nan Assembly House bul hnaiah vantlang, politics, sakhuana leh thil dang vanga mi panga aia tam punkhawm leh bengchheng siam a khap. Dak-inpui aṭanga Raj Bhavan chhim lam gate inkar leh Tennis Court aṭanga Treasury Bazar inkarah khapna hi kenkawh a nih dawn a, March 10, 2022 thleng a huam ang.