CYMA leh DGP-in thawhho dan tur sawiho

Central YMA hruaitute chuan nimin khan DGP Srivastva chu a pisaah an kawm a, thawhhona tur kawng hrang hrang an sawipui.

Inkawmnaah hian ramria police duty-na hmunte thuam ṭhat a ṭul thu sawi a ni a; CYMA hruaitute'n police duty post-a mamawh - solar plate, tui thianghlim leh lirthei ṭha zawk pek chungchang an sawi.

CYMA hruaitute chuan, police indaih lohna leh post ruak hnawhkhat tura YMA-in sorkar a ngen thu leh chumi lama hmalaknaah YMA-in ṭawiawm an inhuam reng thu an sawi a; Police lirthei daihzai zawka hman a nih theih nan leh police-te daihzai zawka an awm theih nan ruahmanna siam turin an ngen bawk. An thu thlente chu en zui a tum thu DGP chuan a sawi a ni.

Ramri kâna ruihhlo leh kuhva rah tawlh rûk chungchangah thawhhona ṭha neih a ṭul thu leh theihtawp chhuaha police leh YMA-te ṭanho a ṭul thu CYMA hruaitute chuan an sawi bawk.