House-ah member thi pathum sùn a ni

Nimin khan Assembly session-ah House member hlui thi tawh mi pathum sûnna hun hman a ni a, sùn nan member-te ngawi rengin an ding.

House member ṭhin thi ta an sùnte chu Saitlawma Sailo, C Ramhluna leh Hrangthanga Colney te an ni a; House leader Zoramthanga'n an chanchin leh uina thu a sawi a, member dangte'n uina thu an sawi ve bawk.

MLA hlui Saitlawma Sailo (81), Theiriat, Lunglei hi November 5, 2021 chawhnu dar 1:45 khan Aizawl Hospital & Research Centre-ah zunthlum leh pneumonia vangin a thi a, a tukah vui a ni. Amah hi Mizoram union territory a nih hlima inthlanpui hmasa ber, kum 1972 khan Ṭawipui bialah MLA atan thlan tlin a ni.

C Ramhluna (74) w/o Lalrinawmi, Bungkawn chu November 22, 2021 zan dar 8:45-ah a thi a, a tuk November 23-ah vui a ni. October 20, 1947-a Chawnhù, Lawngtlai district-a piang C Ramhluna hi Mizoram Principal Chief Conservator of Forest (PCCF) hlui a ni a, kum 2008 tàwp lama Assembly inthlanpuiah MNF ticket-in Lawngtlai West bialah MLA atan thlan tlin niin, term khat chhung MLA a ni. Kum 2019 aṭanga a thih thlengin SEDP Commerce & Industry Development Board-ah vice chairman a ni bawk.

Hrangthanga Colney (81) h/o Lalthlamuani, Zarkawt chu minister hlui a ni a, December 22, 2021 zing dar 8-ah Covid-19 leh natna dang vangin State Referral Hospital-ah a thi. Amah hi June 1, 1940-a piang niin, thiamna lamah BA a ni a; kum 1993-a Assembly inthlanpuiah Khawbung bialah independent (Mizoram Janata Dal)-in a ding a, thlan tlin a ni. MJD (independent) leh Indian National Congress-te'n sorkar inṭâwm an siamah cabinet minister a ni a, Industries, Excise leh Taxation department-te a enkawl a ni.