Aitlang leh Buarchep rama Mizo huante lak lêt tumna a awm - Home Minister
Home minister Lalchamliana chuan nimin khan ZPM Legislature Party member Lalchhuanthanga zawhna ziaka chhangin, Aitlang leh Buarchep rama Mizo huante chu lak lêt tum a nih thu a tarlang a, lak lêt tuma hmalak dan a tarlang bawk.
Lalchamliana chuan, Aitlang leh Buarchepa huan leh leilette chu Mizoram leh Assam-in ram neitu nih an inchuhna hmuna awm a nia tarlangin, "Huan neitute buaina leh harsatna tawh pawh h Mizoram leh Assam state ramri pawm dan inang loin a nghawng/hrin chhuah a ni a, heng buainate chingfel tur chuan state pahnihte ramri buai hi tihfel phawt a ngai dawn," a ti.
Home Minister chuan, August 5, 2021-a Aizawla state pahnih aiawh te Mizoram Home Minister leh Assam Border Protection & Development Minister kaihhruainaa an inhmuh hnua hmalakna leh indawrnate a tarlang bawk.
Home minister Lalchamliana chuan nimin khan ZPM Legislature Party member Lalchhuanthanga zawhna ziaka chhangin, Mizoram leh Assam ramria buaina chinfelna tura sorkar hmalaknate a tarlang.
Mizoram leh Assam indâwr dan
1. MHA-in Mizoram-Assam ramri chungchanga nodal officer atana a ruat MHA Joint Secretary (JKL) kaihhruaina hnuaiah October 17-18, 2021 khan Mizoram leh Assam sorkar aiawhte Vairengte CRPF camp-ah leh Mandir tlanga Assam IR camp-ah an ṭhukhawm
2. Mizoram leh Assam chief minister-te November 25-26, 2021 khan Delhi-ah meeting ṭum hnih an nei a, ramri chu political dialogue hmanga chinfel ṭha an tih thu an sawi.
3. December 22, 2021 leh February 3, 2022 khan Mizoram Home Minister leh Assam Border Protection & Development Minister-te'n ramri kaihhnawih hrang hrang sawiin video conference meeting an nei. Ramri buai chu ralmuang tak leh innghirnghona tel loa chinfel ṭha an tih thu te, CM pahnihte'n political dialogue hmanga ramri chinfel an duh thu an sawi te, DC level meeting regular taka neih ṭha an tih thu te, Aitlanga huan/lo neitute harsatna chinfel dan tur bakah, Assam-Meghalaya ramri buai chinfel nana state pahnihte'n Regional Committee an din chungchangte sawi a ni.
4. Hmarchhak state hrang hranga ramri buai chingfel tura MHA-in a ruat Manohar Parrikar Institute for Defence Studies and Analysis-te lo kal huna pek tur, ramri chungchanga MIzoram ṭan chhan tarlanna approach paper pawh peih a ni tawh.
5. Mizorama political party leh pawl hrang hrang aiawhte telna Boundary Committee 27.7.2021-a din chu ṭum thum - July 30, September 2 leh November 17-ahte khan an ṭhukhawm tawh a ni.