February 22-a Covid-19 positivity rate 22.20%

February 22, Thawhlehni khan Mizoramah Covid-19 vei mi 1,295 hmuh chhuah a ni a, positivity rate 22.20% a ni. Nimin khan hripui vei dam tawh mi 1,473 chhuahtir an ni.

Covid-19 vei Thawhlehnia hmuh tharte chu mipa 558 leh hmeichhia 737 an ni a; RT-PCR hmanga hmuh 129, TrueNAT hmanga hmuh 60, RAT hmanga hmuh 1,075 leh FIA hmanga hmuh 31 a ni.

Tun February thla chhungin Covid-19 positive mi 34,267 hmuh a ni tawh a, January 2022-a hmuh zat 33,357 aiin 910-in a tam tawh zawk a; hmuh tam ber thla - September 2021-a hmuh zat 34,831 chu 564 chiahin a la pha lo thung.

Mizorama district 11 zinga district 10 chu positivity rate 10% chung lam a ni a, district pasarih chu 20% chung lam niin, district pathum chu 30% chung lam a ni a, Lawngtlai district-ah 50.38% a tling. Kolasib district-a sample 25 endik zingah positive an awm lo.

February 22-a Mizorama positivity rate chu 22.20% a ni a, ni 32 chhung a záwnin Covid-19 positivity rate 20% chung lam a ni tawh; January 22, 2022 aṭang khan ni tin positivity rate 20% aia sang vek a ni.

Nimin tlai dar 5 thleng khan hripui vei dam tawh mi 1,473 chhuahtir an ni a; district tina chhuahtir zat chu - Aizawlah mi 544, Lungleiah 213, Champhaiah 154, Mamitah 146, Serchhipah 121, Lawngtlaiah 98, Khawzawlah 66, Siahaah 41, Saitualah 37, Hnahthialah 35 leh Kolasib-ah 18 an ni.

IDSP record angin, Mizoramah Covid-19 vei 2,09,289 hmuh chhuah a ni tawh a, mipa 98,001 leh hmeichhia 1,11,288 an ni a, mipa aiin hmeichhia 13,287-in an tam zawk. Nimin tlai dar 5 thleng khan mi 2,00,867 (95.98%) chhuahtir an ni tawh a, mi 648 (0.31%) thi tawhin, enkawl mek mi 7,774 (3.71%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,09,289 chu mi 1,000 zelah hripui vei mi 190 an awm ang a ni a; mi 1,00,000 zela Covid-19 vangin mi 59 an thi tawh ang a ni tih sorkar thuchhuakin a tarlang.

Mizoramah February 22, 2022 thlenga swab sample endik tawh 18,08,887 aṭanga positivity rate chu 11.57% a ni a; RT-PCR hmanga endik zat percentage chu 20.38 a ni a, RAT hmanga endik zat chu 73.94% a tling.