Sorkar kal dan awmze nei loah ngai

MPCC chuan thuchhuah siamin, MNF sorkar flagship programme, Socio-Economic Development Programme (SEDP) kaltlanga hmalakna Governor-in Assembly session-a a tarlante chu duhkhawpawm lo hlea an hriat thu leh MNF sorkar kal dan chu awmze nei loa an ngaih thu an tarlang.

Governor thusawiah, SEDP-ah cheng vbc. 200 dah a nih thu tarlan a ni tih sawiin MPCC chuan, "SEDP hmanga hnathawh tarlante hi a tlem lulai deuh niin kan ngai. Inthlan hmaa an intiamna in tina cheng nuai thum sem a nih tur thu ziah lan a la ni miah lo hi a mak kan ti tak zet. CM Pu Zoramthanga'n a ngaih pawimawh em em mau/rua chìn chungchang SEDP-a a tel miah lote hi a mak kan ti a, MNF sorkar kal dan hi awmze nei loah kan ngai," an ti.

Congress party chuan, "SEDP cheng nuai thum dawng sawi tur an la awm miah loh laia SEDP sum hmanga BSF-te awmna tur siamsak a nite hi a mak hle," an ti a; Governor thusawiah SEDP-in hmun a chan tlem dan ngaihtuahin MNF sorkarin SEDP tihhlawhtlinna kawngah hmalak tumna tak tak a nei miah loa an ngaih thu an sawi.

MPCC chuan, SEDP atana sum dah aṭangin sorkar department hrang hranga hna thawh nan vbc. 83.39 pek a nih thu te, Entrepreneurship Development Scheme hnuaiah Covid-19 dona atana mamawh PPE leh a dangte entrepreneur-te siamtirna atan sum eng emaw zat hman a ni tih tarlan a nih thute an sawi bawk.