Inthlanah party dang thawhpui tumna kan nei lo - ZPM Working President

ZPM working president K Sapdanga chuan, Mizoram mipuiin ZPM chief ministerial candidate Lalduhoma chu sorkar kaihruai tura enchhin an duh tawh thu leh, inthlanah party dang thawhpui tumna an neih loh thu a sawi.

Nimina Lawngtlai Press Club-a thuthar thehdarhtute a kawmnaah K Sapdanga chuan, party ṭhenkhatte'n an mi leh sate ui beh nan ZPM nena thawk dun tur angin thu an thehdarh ṭhin tih sawiin, "Hei hi thu belhchian dâwl lo a ni. Party ṭhenkhatte'n ZPM hruaitute zingah inhruipawhna a awm ni àwmin an sawi chiam a, ZPM hian chiang taka a sawi duh chu, hruaitute zingah inhruipawhna a awm lo. Zoram mipui hian ZPM chief ministerial candidate Pu Lalduhoma hi sorkar kaihruai tura enchhin an duh tawh a ni," a ti.

K Sapdanga chuan, kum 2023 MLA inthlanpuiah Mizoram mipuiin ZPM an tinzâwna a lan thu sawiin, "Hei vang hian MNF leh Congress party-te hian ZPM sawichhiat leh ZPM hotute inngeih lo anga phuah chawpa theh darh chu hnapui berah an nei dun mek," an ti a, chumi kawngah chuan an inthurual viau niin a sawi.

Lai district-in MLA hmangcháng hre tak an nei tih sawiin Sapdanga chuan, "Mahse, CM-in a kuah bik zingah an tel pha ve lo a, district hmasawnna thlengin a tuar ta a ni. ZPM hian Lai district tan tih ngei duh kan nei a, kum 2023 inthlanah Lai district leh Lawngtlai khawpui hian ZPM mi ngei minister in neih theih nan theihtawp kan chhuah dawn a ni," a ti.

ZPM Working President chuan, district council chak zawka hnathawk thei tura thuam leh thlamuang taka awm tir an tum thu te, ADC-te'n Sixth Schedule hnuaia funding pattern leh thil dang siamṭhat an duh dan an hriatpui thu leh sorkar laipuiin direct funding a remtih chuan ZPM chuan harsatna siam lo turin ngaihdan an siam tawh thu te, Kaladan Multi Modal Transit Transport Project kawngpui peih a nih hunah Lai district chu India ram pum tana Asia chhimchhak kawtchhuah a nih dawn thute a sawi bawk.