Mizoramah ṭhelrêt kûng puitling hnài theih 2,00,000 vel a awm

Land Resources, Soil and Water Conservation minister R Lalzirliana chuan, Mizoramah ṭhelrêt (rubber) kûng puitling hnài theih 2,00,000 vel a awm thu nimin khan Assembly House-ah a sawi.

MNF member Dr K Pachhunga leh Zothantluanga te zawhna chhangin R Lalzirliana chuan, Mizoramah rubber plantation siam thar tumna a awm thu a sawi a, "Rubber Board of India (RBI) hian rubber chingtute tan a thlawnin a chi/ṭiak an pe thei a, subsidy thlengin an ngaihtuahpui thei," a ti.

R Lalzirliana chuan, RBI hnuaiah Mizoramah company pakhat, Manimalyar awmtir tura hmalak mek a nih thu te, ram hectare khatah ṭhelrêt kûng 500 chìn theih a nih thu te, ṭhelrêt hnái kg. khat Rs 145 vela hralh ṭhin a nih thu te, smoke house 50 sak tum a nih thu te, Mizoram sorkarin support price a pek loh thute a sawi bawk.