Chief Minister-in kum 2022-23 atana Mizoram budget vbc. 14,008 a pharh

Finance changtu chief minister Zoram­thanga chuan nimin khan Assembly budget session-ah kum 2022-23 atana Mizoram budget ruahman cheng vbc. 14,008.15 a pharh. Budget thar hi kum 2021-22 budget cheng vbc. 11,148.89 aiin vbc. 2,859.26-in a tam zawk a, a punna chu 25.65% a ni.

Chief Minister hian budget a pharh rual hian kum 2021-22 chhunga sum indaih lohna phuhrûkna tur Supplementary Demand for Grants cheng vbc. 12,290.63 a pharh nghal bawk.

Chief Minister chuan, Mizoramin nasa takin sum harsatna a tâwk tih sawiin, "Sum harsatna bulpui ber hi mipuiin an hriat ve a ṭul hlein ka hria. Kum hmasa lam daih aṭang tawh khan kan tax share dawn tur zat kan dawng kim lo tam hle. January-March 2020 chhung khan cheng vbc. 867.39 kan hmu kim lo a, kum 2020-21 chhunga kan hmuhin cheng vbc. 1,093.73-in kan budget bituk a phak loh bakah, kum 2021-22 quarter hmasa ber khan cheng vbc. 125.46-in kan hmuh tur zat kan hmu pha lo a ni," a ti.

Zoramthanga chuan, 15th Finance Commi­ssion-in Mizoramin kum 2019-20 ah tax share leh revenue deficit grant a hma kum nena khaikhinin hmuh a tlem hle tura an ngaih avangin special grant cheng vbc. 546 pek turin rawtna an siam thu a sawi a, "Special grant hi tun thlengin kan la hmu lo. A vaia kan sum hmuh tur kan hmuh kim tak loh chu cheng vbc. 2,632.58 a a ni," tiin, beisei ang sum hmuh a ni lo chuan economy derthawng sa tawh tak a nghawng nasat thu a sawi.

SEDP hnuaiah cheng vbc. 700 ruahman a nih thu sawiin CM chuan, "Hemi aṭang hian cheng vbc. 350 chu family development lam hawia hman tur a ni a, cheng vbc. 100 chu sorkar ngaih pawimawh danga a ṭul ang zela hman atan a ni. Cheng vbc. 200 chu sorkar laipui aṭanga hmasawnna tur sum kan dawn lo do lêtna atan dah a ni a, cheng vbc. 50 chu road maintenance atan hman a ni ang," a ti.

Kum 2022-23 chhunga sorkar laipui aṭanga sum hmuhna tura ruahmante chu - sorkar laipuia chhiah tlingkhawm state-a sem (Share of Central Taxes) aṭangin cheng vbc. 4,083.24, Post Devolution Revenue Deficit Grant cheng vbc. 1,615, Urban Local Body grant vbc. 35, Rural Local Body grant vbc. 71, State Disaster Response Fund (SDRF) vbc. 49 leh Health grants vbc. 31.19 a ni.

State chhunga sum hmuhna tura ruahmante chu - state sorkara chhiah tling khawm sorkar hnathawk leh cooperative society-te'n loan an rulhna Recovery of Loan & Advances aṭangin cheng vbc. 33.61, State Own Tax Revenue (SOTR) vbc. 801.30 leh chhiah ni lo aṭanga sorkarin sum a hmuh State Own Non Tax Revenue (SONTR) aṭangin vbc. 836.43 a ni.

SONTR-ah hian Power & Electricity department subsidy-a chhûn tur cheng vbc. 109 a tel a; Mizoram budget zinga Mizoram sorkarin a tum ve tur chu cheng vbc. 1,671.34 (11.93%) a ni.

Mizoramin centrally sponsored scheme hrang hrang a kalpuina turah sorkar laipui aṭangin cheng vbc. 2,646.64 hmuh beisei a ni a; páwn lam aṭanga puihna (external aided project) aṭangin vbc. 280.47 (grant vbc. 261.13 leh loan vbc. 19.34) hmuh beisei a ni. PM-DevINE/NLCPR/ NESIDS/ NEC, Scheduled Tribe Welfare Grant leh Central Road Fund aṭangin vbc. 985.77 hmuh beisei a ni bawk. Sum pûk tura ruahman chhin chu vbc. 2,548.34 a ni.

Mizoram budget pumpui aṭanga 71.43% (cheng vbc. 10,006.51) chu sorkar hnathawk hlawh, pension hlawh leh sorkar inrêlbàwlna (Revenue Expenditure) atana ruahman a ni a; a bâk cheng vbc. 4,002.54 (28.57%) chu hmasawnna hna thawhna (Capital Expenditure) atan dah a ni. Kum 2021-22 budget-ah Revenue Expenditure 82.67% a ni a, Capital Expenditure chu 17.33% a ni thung.

Budget pharh zawhah Chief Minister chuan Assembly Annexe conference hall-ah thuthar thehdarhtute a kâwm a, budget a pharh tak a sawifiah. Zawhna chhángin Zoramthanga chuan, tun dinhmunah chhiah tihpun tumna a awm loh thu a sawi a, "A amount tipung lo mah ila, a khawn dan phung thlâk danglam chuan chhiah lut a tam ngei dawn. Chu chu hmalak kan tumna ber pakhat a ni. Chhiah thar lâk tumna a awm lo," a ti.

Thuthar thehdarhtute a kawmnaah hian CM hi IPR minister Lalruatkima leh Finance department official-te'n an ṭawiawm a ni.