Assembly session-ah ṭhu tawh dawn

ZPM Political Affairs Committee (PAC) member-te chu nimin khan an ṭhukhawm a, Assembly budget session neih mek chu a pawimawh em avangin, ṭhutkhawm leh aṭang chuan ZPM MLA-te chu tel chhun­zawm tawh ni se, an ti a; Congress party pawhin an MLA-te an tel tawh dawn tih an puang.

ZPM PAC chuan, speaker Lalrin­liana Sailo-in dan kalhin contract hnaah hlâwkna a tél nia puhna voice record chu House leader Zoramthanga’n rintlak loh nia a sawi chungchangah, "Ngun taka finfiahna awmte kan thlirin, voice record hi siam chawp a ni lo tih khawtlang aiawh, mi zahkai (prominent citizen), NGO hruaitute'n an sawi nawn leh hian thu tling leh ngai­mawh tlak niin kan hria," an ti a; Assembly House zahawmna hum­him aia insawifiah a ni chu lung­chhiatthlak an tih thu an sawi.

Assembly Speaker chungchang chu Lokayukta chhui turin ngenna an thlen tawh tih sawiin ZPM chuan, "House zahawmna humhim tura eptu MLA-te ngenna zah zo lo sorkar kan nei hi a pawi kan tih rualin, session hi hun pawimawh leh eptute'n rorelna hmun ngeia sorkar khalh ngil tura an au chhuahna hmun a nih avang leh, ni hnih lai an lo chhuahsan chu tâwk tawhin PAC chuan a hria a, budget session kal mekah hian ṭhu chhunzawm tawh turin a rêl ta a ni," an ti.

MPCC chuan, "House leader CM Zoramthanga’n Khawzawl-Ngaizawl kawng siamnaa cheng nuai 100 fanghma no eitua mipuiin an ngaih Assembly Speaker a hum tak tlat avangin MPCC Political Affairs Committee rorel angin, rorelna dik a awm theih nana theih­tawp chhuah turin kan MLA-te chu budget session-ah an tel zui leh dawn a ni," tiin an puang a ni.

Assembly Speaker-in Khaw­zawl-Ngaizawl kawng laihna sum cheng nuai 820.33 aṭangin nuai 100 a lak thu voice record-a lang chu mak an tih thu sawiin MPCC chuan, "Mizoram politics tibawlhhlawhtu lian takah kan ngai," an ti a; January 13, 2022-a Central YMA-in Mizorama PMGSY kawng siam eng emaw zat an endiknaah Lalrinliana Sailo hming a lan tawh thu leh, Khawhai-Tlangpui kawng laihnaah pawh a hming a lan thu an sawi.

Congress party chuan, Lalrin­liana Sailo chu Congress party-a a awm lai aṭang tawhin sum leh paiah hmingchhiatna a ngah tih sawiin, "MNF party pawhin press release-te siamin, total bandh hial an buatsaih a, a fapa hminga damdawi license siama khehpuama inhnamhnawiha puhna nasa tak avangin Congress party chuan chanvo pawimawh a pe ta lo a, kum 2013 aṭangin minister pawh a ni zui ta lo a ni," an ti.

ZPM party chuan, Assembly Speaker puhna chu an ûm zui zel dawn tih sawiin, "Lokayukta hian a chhui chian ngei kan beisei rualin, Prosecution leh Investigation staff-te thuam ṭha turin sorkar kan ngen nghal. Sorkar rorel dan kalphung sawipui tur hian Governor hnenah ngenna thlen a ni tawh bawk," an ti a; ZLP member-te chu House zah­awmna humhim tur leh an aiawh mipui tana theihtawp chhuah turin duhsakna an hlan tih an sawi bawk.