NE-a lungalhthei dap hna thawh mumal lo a lawmawm lo - LS MP

Lok Sabha MP C Lalrosanga chuan February 22-23, 2022 chhunga New Delhi-a Parliamentary Standing Committee on Coal, Steel and Mines ṭhutkhawmah hmarchhak biala lungalhthei dap hna thawh a mumal lo chu lawmawm lo a tih thu a sawi.

C Lalrosanga chuan, tlang ram chhengchhia leh ramngawte kaltlanga rél kawng leh motor kawngpuite siam mek a nih thu sawiin, "Hetiang a nih laia harsatna hrang hrang vanga hna thawh a harsa anga sawi hi a awihawm loh. Mizoram tiamin hmarchhak biala hna thawhna atana tun kum thum kal ta chhunga sum ruahman leh senso a tlem tual tual hi a lungawithlak loh a ni," a ti a, theihtawpa ṭan la thar turin Coal ministry hotute a ngen.

Sorkar thuchhuah tarlan danin, Parliamentary Committee ṭhutkhawm hi chairman Rakesh Singh-a'n a kaihruai a; India-in lungalhthei a laih chhuah zat chu 10%-a pungin, nakkumah chuan ton nuai 8,850 tling thei tur leh kum 2030-ah chuan India ramin a mamawh aia tam ton nuai 15,110 a tlin rin a nih thu tarlan a ni. Kawlphetha siamna atana ram dang aṭanga lungalhthei lak luh a ngai lo thuai dawn niin tarlan a ni bawk.