LMC din turin inbuatsaih mek a ni

Lunglei Municipal Council (LMC) dinna turin November 24, 2021 khan LMC dinna tur hriattirna chhuah a ni tawh a, kum 2021-22 atana bul ṭan nan budget allocation cheng nuai 80 (non salary nuai 73.40) dah a ni.

Sorkar thuchhuah tarlan danin, January 24, 2022 khan LMC tana CEO, secretary, superintendent, finance & accounts officer leh assistant post-te siamna tur hriattirna tihchhuah a ni. Pisa dinna tur pawh sorkar aṭangin pawm a ni tawh a, Lunglei Convention Centre-ah bul ṭan tum a ni.

LMC huam chin leh ward huam chin te, Lungleia VC awm lai local council-a thlak dan turahte sorkarah rawtna thlen a ni tawh a; Finance department-ah LMC tana 10% ULB Grant hmanna tur expenditure sanction proposal thehluh tawh niin, sorkar kum thar aṭangin bul ṭan theih beisei a ni.

LMC din turah hmalakna kal mek leh hmachhawpte zirhona, ‘Sensitization Meeting on Lunglei Municipal Council’ chu nimin khan Lunglei Convention Centre-ah neih a ni a, UDPA director H Lianzela leh AMC joint municipal commissioner H Lalhmingthanga ten an hmanpui.

H Lianzela chuan, Lunglei khawpui hmasawn zel nan municipal body chak tak in a enkawl a hun tawh tih sawiin, "LMC din a nih chuan thuneihna sem zâina (decentralization of power) a takin kan hmu ang a, mipui thlan an aiawhte'n khawpui enkawlna kawngah mawhphurhna leh thuneihna sang zawk an nei dawn a ni," a ti.

15th Finance Commission hnuaiah kum tin urban local body (ULB)-te'n inenkawlna leh hna thawhna tur ULB grant cheng vbc 35 chuang a hmuh ziah beisei a nih thu sawiin H Lianzela chuan, "Lunglei mipui zat chhûtin kum tin cheng nuai 570 chuang LMC-in a chang thei tura beisei a ni a, census tharah chuan mipui an pun dawn avangin grant dawn tur pawh a pung dawn," a ti a; LMC inthlan pawh a hma thei ang bera neih an duh thu a sawi.

H Lalhmingthanga chuan AMC inrêlbàwl dan tlangpui leh hmalakna hrang hrang - property tax, licensing, hoarding, parking, solid waste management, building permit chungchang a sawifiah a; LMC din a nih hnuah Lunglei khawpuia kalpui dan tur leh a rate-te siam a nih tur thu a sawi bawk.

Sensitization Meeting on LMC-ah hian MJA, MUP, YMA Sub-Hqrs leh Chhimbial Chhantu aiawhte leh sorkar official-te an tel a ni.