KHAWTHLIR

Thisen pe
Saiha College NSS unit chuan nimin khan Siaha District Hospital tan thisen unit 14 an pe a, petute mipa 12 leh hmeichhia pahnih an ni.

ICDS-II sawiho
Mamit District Coordination Committee chuan an chairman Lalnunhlua, bawrhsap hoin nimin khan Integrated Cooperative Development Project (ICDP) Phase-II chungchang an sawiho. ICDS Phase-II hnuaiah hian khaw hrang hranga cooperative society 25 hnenah ṭanpuina (loan) pek a ni dawn a ni.

Model village hawng
Rajya Sabha MP K Vanlalvena'n Sansad Adarhs Gram Yojana (SAGY) hnuaia model village atana a thlan panga zinga pakhat, Phura khuaah nimin khan model village thlan pualin hun hman a ni a, Siaha DC Lalsangliana'n a hawng. Bawrhsap chuan, model village ni tlaka mawi leh ṭha ni tura inpuahchah turin khaw mipui a chah.

Science Olympiads
Samagra Shiksha Project hnuaia mathematics leh science lama hmasawnna tur leh naupang theihna (talent) nei ṭhate inelna, District Level Science Olympiads 2022 chu nimin khan Mamit district project coordinator PC Lalngaizuala hoin internet kaltlanga neih a ni a, middle school hrang hrang aṭangin zirlai 15 an tel.

Silai mu leh airgun man
Assam Rifles leh police-te chuan nimin khan Siaha district-a Myanmar ramri bula awm Lungbun khuaah silai mu tam tham tak leh NX 200 airgun leh a neitua puh Myanmar mi mi pahnih an man.Assam Rifles leh police-te hian nimin khan Mizoram-Myanmar ramri bula checkpost-ah Kenbo bike leh Royal Enfield bike pakhat ve ve, Myanmar mite'n an khalh chu an enfiah a, silai mu 2,000 leh airgun pakhat an man a ni. AR thuchhuah chuan, ralthuamte chu Myanmar-a CDF mite ta tur nia hriat a nih thu a tarlang.