SEDP sem vangin sorkar leibá a pun phah tur a ni lo - MPYCC

Mizoram Pradesh Youth Congress Committee (MPYCC) chuan thuchhuah siamin, Mizoram sorkarin SEDP a sem tur chu lawmawm an tih thu an tarlang a, chutih rualin, "SEDP sem avangin sorkar leibá a pun phah tur a ni lo," an ti.

Assembly budget session neih mekah nimin khan Chief Minister-in kum 2022-23 atana Mizoram budget a pharh tih sawiin MPYCC chuan, "Sorkar kum 2022-23 chhung atan Mizoram sorkar hian SEDP atan cheng vbc. 700 a dah tih tarlan a ni a, Mizoram sorkarin SEDP sem a tum hi lawmawm kan ti a ni," an ti a; kum 2018 inthlan dawna an intiam ang ngeiin, chhungkaw tinah Rs 3,00,000 sem ngei turin an phût a ni.

Congress ṭhalaite chuan, "Chief minister ni mek Pu Zoramthanga'n NLUP dawng tawhte pawhin SEDP an dawn ngei tur thu mipuia a lo tiam tawh angin, hleih nei hauh loa SEDP hi sem turin kan phût," an ti a; an intiam ang zat an sem lo a nih chuan thu dik lo hmanga lalna leh thuneihna duh luat vanga Mizoram mipui bumna lian tak a nih dawn thu an sawi.