MJA golden jubilee pualin zirhona buatsaih
MJA Gen.Hqrs chuan an golden jubilee pualin February 23, Nilaini khan Aizawl Press Club-ah rilru leh taksa rimtawngin nghawng a neih theihte hmachhawn leh sutkian dan zirhona an buatsaih a; MJA Lawngtlai district pawhin nimin khan DC conference hall-ah sorkar hotute pualin media awareness programme an buatsaih.
Aizawl Press Club-a 'Workshop on stress & stress management' hi MJA president Zonunsanga Khiangte-in a kaihruai a; journalist-te chu hmanhmawh leh indaih lo rêng rênga kartluana hna thawk, ei leh in hunbi thlenga mumal nei lo an nih avangin stress nei awlsam zinga mi an nih thu sawiin, "Chumi hmachhawn leh tihkian zel dan kan hriat hi a ṭul a ni," a ti.
He hunah hian clinical psychologist Dr Lalremruati, Aizawl West College chuan rimtawngna (stress) chuan thil pawimawhte a zirtir a; ni tin nun hman dan, thil tawn leh chhehvel boruakte a pangngai reng thei lo tih sawiin, "Ei hmuhna atan hna kan thawk nasa a, kan hnathawhna boruak leh a chhehvelahte harsatna neuh neuh thlen cháng a tam thei. Hna kan ngaih pawimawh laiin hahdamna lam kan ngai pawimawh lo ṭhin a, hei vang hian rilru leh taksaah harsatna a thleng ṭhin a ni," a ti.
Dr Lalremruati chuan, stress-in rilru leh taksa a nghawng dan te, mizia a nghawng dan leh natna dang a thlen theihte a sawi bakah, stress tihtlem theih dante a sawi a; taksa sâwizawi, ei in tihṭhat, mut ṭhat, ṭhian ṭha kawm, lâwm thiam, ṭawngṭai leh fiamthu thianghlim ngaihthlak leh sawi chinte a ṭhat thu a sawi.
Resource person dang Rebecca Lalnundiki, clinical psychologist chuan stress a thlena tâl chhuah leh tihreh dan a sawi a; thâwk lâk leh rilru sàwr bingna hmanga rilru leh taksa sawizawi dan a takin a tihpui bawk.
Lawngtlai MJA-in nimina DC conference hall-a media chungchang inzirtirna (media awareness programme) an buatsaih chu bawrhsap Dr Andrew H Vanlaldika'n a hmanpui a; Lawngtlaia IPRO C Lalhruaitluanga'n 'Sorkar leh mipui rawngbawlnaah media' tih thupui a sawi.
Dr Andrew H Vanlaldika chuan, media hmasawnna nasa tak karah sorkar hnathawkte'n media hman thiam a pawimawh thu sawiin, "Mahni thil tih puanzar nan media hman ṭangkai a pawimawh rualin, a kalkawng leh hman danah erawh fimkhur a ṭul," a ti a; chanchinbumite thawhpui thiam tur leh rilru inhawng taka thurawn leh zirtirna ngaithla turin kal khawmte a chah a ni.