MLA leh ANDS-in thuthlung an ziak

Aizawl North-II bialtu MLA Dr Vanlalthlana leh Aizawl North Development Society (ANDS)-te chuan zirna, intodelhna leh hriselna lama hmalakhona turin February 23, Nilaini khan thawhhona thuthlung, memorandum of understanding an ziak.

MoU hnuaiah hian ANDS-in MLA fund hmangin zirna, intodelhna leh hriselna kawngah hma an la dawn a, MLA fund hmanga hna thawh turah pawh implementing agency-ah ṭangin, ṭha taka MLA fund hmanga hna thawh a nih theih nan hnathawhte an enkawl ṭhin dawn a ni.

Dr Vanlalthlana chuan, MoU ziah rualin pathology laboratory, common facility centre for food packaging centre, common facility centre for bakery and confectionary, common facility centre for home trades leh specialised library for central services examination buaipuina turin MLA LADS aṭangin recommendation letter a pe nghal a, ANDS-in project-te chu an buaipui ang.

MLA fund chu bial chhung mipuiin a ṭangkai thei ang bera an hman dan tur a ngaihtuah nasat thu sawiin Vanlalthlana chuan, "Kum nga chhunga cheng nuai 750 awm aṭangin ṭhalaite'n thiamthil zirna leh intodelh duhte tana kawng buatsaih hi ngaih pawimawh a ṭul hle," a ti a; thuziak leh lemziak thiamte hmangin sikul naupangte tan nungchang ṭha kawhhmuhna comics buatsaih mek a nih thu a sawi bawk.