Covid-19 vangin mi 652 an thi tawh

Nimin khan tlai dar 5 thlengin Mizoramah Covid-19 vangin mi pahnih an thi a, February 23, Nilaini khan mi pahnih an thi bawk. Mizoramah hripui vangin mi 652 an thi tawh a, kumin February thla bikah mi 42 an thi tawh.

February 23, Nilaini tlai dar 4:15 khan Zaneihzovi (86), East Phaileng chu hripui vangin State Refferal Hospital-ah a thi a, Covid-19 vei a ni tih February 23 vêk khan finfiah a ni a, natna dang nei tel a ni. C Rokhuma (77), Theiriat pawh Nilaini tlai dar 5:14 khan Lunglei District Covid Health Centre-ah a thi a, a thih hma lawkin DCHC-ah dah luh a ni.

Nimin zing dar 4 khan R Mangkhuma (78), Zemabawk Vengthar chu hripui vangin an chenna inah a thi a; Covid-19 pisitive a ni tih February 23, Nilaini khan hmuh chhuah a ni a, natna dang nei tel a ni. Raltawna Sailo (73), Champhai Kahrawt pawh nimin chawhnu dar 1:30 khan Champhai DCHC-ah a thi a; Covid-19 vei a ni tih February 17 khan hmuh niin, natna dang nei tel a nih thu sorkar thuchhuakin a tarlang.