February 2022 - hripui vei hmuh tam ber thla

February 23, Nilaini khan Mizoramah Covid-19 vei mi 964 hmuh chhuah a ni a, February thla chhungin hripui mi 35,231 hmuh tawh niin, hmuh chhuah tam ber thla a ni tawh. Nimin khan hripui vei dam tawh mi 1,382 chhuahtir an ni a, mi pahnih an thi.

Covid-19 vei Nilainia hmuh tharte chu mipa 402 leh hmeichhia 562 an ni a; RT-PCR hmanga hmuh 162, TrueNAT hmanga hmuh 27, RAT hmanga hmuh 755 leh FIA hmanga hmuh 20 an ni.

February thla ni 23 chhungin Covid-19 positive mi 35,231 hmuh a ni tawh a, January 2022-a hmuh zat 33,357 aiin 1,874-in a tam tawh zawk a; a hmaa hmuh tam ber thla - September 2021-a hmuh zat 34,831 aiin 400-in a tam zawk tawh bawk.

February 23-a Mizorama positivity rate chu 26.45% a ni a, ni 33 chhung a záwnin Covid-19 positivity rate 20% chung lam a ni tawh; January 22, 2022 aṭang khan ni tin positivity rate 20% aia sang vek a ni. Covid-19 positive hmuh zat tlahniam hret hret mah se, positivity rate erawh a la tlahniam lo.

Nimin tlai dar 5 thleng khan hripui vei dam tawh mi 1,382 chhuahtir an ni a; district tina chhuahtir zat chu - Aizawlah mi 485, Lungleiah 221, Mamitah 127, Serchhipah 120, Saitualah 95, Kolasib-ah 78, Champhaiah 73, Khawzawlah 68, Lawngtlaiah 62, Siahaah 28 leh Hnahthialah 25 an ni.

IDSP record angin, Mizoramah Covid-19 vei 2,10,253 hmuh chhuah a ni tawh a, mipa 98,403 leh hmeichhia 1,11,850 an ni a, mipa aiin hmeichhia 13,447-in an tam zawk. Nimin tlai dar 5 thleng khan mi 2,02,249 (96.19%) chhuahtir an ni tawh a, mi 652 (0.31%) thi tawhin, enkawl mek mi 7,352 (3.50%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,10,253 chu mi 1,000 zelah hripui vei mi 191 an awm ang a ni a; mi 1,00,000 zela Covid-19 vangin mi 59 an thi tawh ang a ni tih sorkar thuchhuakin a tarlang.

Mizoramah February 23, 2022 thlenga swab sample endik tawh 18,12,532 aṭanga positivity rate chu 11.60 a ni a; RT-PCR hmanga endik zat percentage chu 20.38 a ni a, RAT hmanga endik zat chu 73.95% a tling.