Aizawlah mi pakhatin ni khatah tui litre 78 Dawn tur a nih laiin, an dawng thei rih lo

Public Health Engineering (PHE) department hotute chuan, tuia Aizawl khawpui châwmtu Greater Aizawl Water Supply Scheme (GAWSS) Phase-I leh Phase-II te siam a nih danah chuan, harsatna awm loa tui pump theih a nihin Aizawlah mi pakhatin ni khatah tui litre 78 an dawng thei tura ngaih a ni a, mahse, ruahman angin Aizawl mipuite tui an pek theih loh thu an sawi.

Vanglaini palai zawhna chhangin PHE department hotute chuan, tun hnaia harsatna an tawh vanga chawlhkar khat chuang tui sem a khaihlak chu October 21, 2018 zing aṭangin dan pangngaiin an sem leh thei tawh tih an sawi a; chutih rualin, "Ni khat lek tui kan pump theih loh hian ni li/nga a nghawng ṭhin a, tunah pawh hian a hma anga mipui mamawh khawp sem leh tur chuan chawlkhar khat tal a ngai ang," an ti.

Tuna Aizawl khawpui châwmtu tui lakna hman mek hmangin Aizawla mi pakhatin ni khata tui a dawn tur zat zawhna chhangin PHE hotute chuan, GAWSS Phase-I leh Phase-II capacity ang chuan mi pakhatin ni tin tui litre 78 dawng thei tura ngaih a nih thu an sawi a; chutih rualin, a nihna ang taka tui pump chhuah a nih loh thu leh mipuiah pawh ni khatah mi pakhat tan tui litre 78 an pek phak loh thu an sawi a ni.

PHE department hotute sawi danin, dan pangngai ang chuan GAWSS Phase-I leh Phase-II hmangin ni khatah tui litre nuai 240-250 (24-25 MLD) pump ṭhin a ni. Phase-I chu siam a nih laiin mi 80,000 châwm zo tura ngaih niin, Phase-II chu mi 3,80,000 châwm zo tura ngaih a ni thung a; Phase I & II hmangin mi 4,60,000 châwm zo tura ngaih a ni.

GAWSS Phase-I leh Phase-II te chu a nih tur ang takin an la hman theih loh thu sawiin PHE department hotute chuan, Phase-I khawl phei hi chu a capacity 10.8 MLD ni mah se, tunah chuan 6 MLD chauh kan pump tawh. Hei vang hian phase pahnihte design angin tui kan pe thei lo a, mi pakhat tan ni khatah tui litre 78 kan pe thei lo," an ti.

PHE hotute chuan, harsatna awm loin an duh anga tam Tlawng tui pump theih ni mah se, a dahkhâwlna lamah harsatna a awm theih thu an sawi a, "Kan storage capacity a lian tâwk tawh lo. Tuizém lian aṭanga zonal tank pekna pipe-te duhthu a sâm tawh lo a, inprovement tih a ngai tawh khawp mai," an ti.

Tui semtu an mamawh ang zat an neih leh neih loh zawhna chhangin, "Indaih, indaih lo tih sawi thiam a har. Indaih leh indaih loh hi chu man power management thiamah a innghah ber zawk," an ti a; tui sem tur mihring ngah mah se, hna sem zai dan thiam loh chuan indaih a harsat thu an sawi.

PHE department hotute chuan, tui pump leh sem kawngah mipuiin hriatpui phak lohin tikhaihlaktu a awm fo thu leh power supply pawh an duhthusam ang renga an hmuh loh thu an sawi a, "Tun hnaiah diesel engine hmangin kan pump nasa a, diesel man a sang tawh si a, tui pump-na atana kan sum sen a san nasat phah hle an ni," an ti.