Secondary School Games ṭan a ni

Mizoram Secondary School Games vawi 36-na chu nimin khan Chhangphut Field, Cham­phaiah ṭan a ni a, Cham­phai DC Dr Naveen Aggar­wal-i'n a hawng.

Mizoram Secondary School Games, 2018 thleng tur hian Champhai leh Thenzawl thlan an ni a; a thawh khatna hmeichhe hockey leh volleyball-te chu October 9-11 chhungin Thenzawlah neih a ni tawh a, hockey-ah Serchhip district leh volleyball-ah Champhai district an champion.

A thawh hnihna chu Champhai khawpuiah ṭan niin, October 26 thleng awh tur a ni a; football, judo, boxing leh athletics-ahte district pariat aṭanga kal zirlai infiammi 363-te an intihsiak dawn. Aizawl district aṭangin zirlai 44, Siaha district aṭangin zirlai 44, Kolasib district aṭangin zirlai 51, Serchhip district aṭangin zirlai 39, Mamit district aṭangin zirlai 49, Lawng­tlai district aṭangin zirlai 36, Lunglei district aṭang­in zirlai 47 leh Champhai district aṭangin zirlai 53 an tel a ni.