Inthlanna felfai nei turin Police-in ṭan la

Mizoram Police Public Relation Officer (PRO) chuan nimin khan thuchhuah siamin, November 28, 2018-a Mizoram inthlanpui neih turah, inthlan puan a nih aṭangin Mizoram Police-te'n inthlanna felfai, dik leh muanawm a awm theih nan hma an la nghal tih an tarlang.

Police PRO chuan, Mizoramah inthlanna dik, felfai leh rálmuang a awm theih nan dan leh thupek kenkawh kawngah police-te'n kawng hrang hrangin hma an la nghal tih tarlangin, Election Commission of India (ECI) duh dan leh ti tura min tih angin hmalak nghal a ni. ECI tuhpek angin flying squad team leh Nakas (checkpost) ten hna an thawk ṭan nghal a ni," a ti.

Police PRO tarlan danin, inthlan atana inbuatsaih nan hian dan loa thil tih hrang hrang dap chuah beihpui thlak a ni a, zu leh ruihhlo zuar te, silai leh sum chelek emawte a awm loh nan nasa takin hma an la a ni. Zu siamna hmun an tichhe nual tawh a; inthlan puan (October 6) aṭanga nimin thleng khan police-te'n rakzu litre 2,865 (Rs. 3,06,350 hû), sap zu Rs. 8,630 hû an man tawh a, zu siamna hmun Rs. 12,94,900 vel hua chhût an tichhe tawh bawk.

Mipuite;n thlamuang tak leh felfai taka vote an thlak theih nan police-te'n theihtawp an chhuah tih sawiin Police PRO chuan, "Police duty leh checking titute pawh uluk taka dan ang zela che tura hrilh an ni. Kan hmalaknate hi ni tin ECI-ah report pek reng a ni a. Chuvangin, mipuite'n kan hnathawh leh hmalaknate hi min thláwp tlat turin in ṭawiawmna leh ṭanpuina kan ngen a ni," a ti.