KHAWTHLIR

Award sem
Nimin khan Chanmari YMA Hall-ah Incentive Cash Awards for Proficiency in Science & Mathematics 2018 sem a ni a, science leh mathematics subject-a zirlai ti ṭhate hnenah hlan a ni. Cash award hi HSLC leh HSSLC-a pakhatna aṭanga pathumnate hnenah leh class IX & XI promotion examination-a science leh mathematics subject-a ti ṭha berte hnenah sem a ni a; kumin hian HSSLC-ah mi 23, HSLC-ah mi 38, class IX-ah mi 27 leh class XI-ah mi 11 hnenah pek a ni.

Tanpuina hlan
Paulians Alumni Association (PAA) chuan nimin khan HIV/AIDS dona kawnga hma latu NGO pakhat, SHALOM hnenah ṭanpuina Rs. 1,50,000 an hlan. PAA hian SHALOM ṭanpuina turin September 28, 2018 khan R Dengṭhuama Auditorium-ah concert an buatsaih a, chuta ṭanga an sum hmuh Rs. 1,50,000 chu nimin khan PAA president Vanlal Duhsaka kaihhruaiin PAA patron TJ Jose, St.Paul's HSS principal-in SHALOM director Dr Chawnglungmuana hnenah a hlan a ni.

Lawngtlaiah training
Nimin khan Lawngtlai district-a political party hrang hrangte tan DC conference hall-ah MLA inthlan lo awm tura campaign kaihhnawih dilna Suvidha application hmanga online-a thil dil dan zirho a ni. Model code of conduct hman a nih tawh avangin political party-te'n public meeting an neih dawn emaw, aurinna an hman dawn emaw, lirthei an hman dawn emawin RO hnenah dil zel a ngai tawh a, awlsam leh hun heh lo zawnga dilnate tih a nih theih nan Suvidha online application buatsaih a ni.

Leitha siam dan inzirtir
KVK Kolasib chuan nimin khan Kawnpuia self help group (SHG) village organization-III te pualin changpât hmanga leiṭha siam dan - vermicompost leh thlai leh thei hlutna tih pun dan zirna an buataih a; soil scientist Dr Carolyn Zothansiami leh programme sssistant Lalrinpuii ten thil pawimawhte an zirtir a ni.