Mizoram hi Ayurveda lama hmasawnna hmun pawimawh a la nih ka beisei - Governor

North Eastern Institute of Ayurveda and Homoeopathy (NEIAH), Shillong leh Directorate of AYUSH, Government of Mizoram chuan nimin khan Lal Thanhawla Auditorium-ah 'Workshop on Ayurveda for Public Health' an buatsaih. Khuallian, Governor Kumannam Rajasekharan chuan, Mizoram chu Ayurveda lama hmasawnna atana hmun pawimawh tak a la nih a beisei thu a sawi.

Governor chuan, Mizoram chu ramngaw thing leh thlai hrang hrang ṭhahnem tak awmna hmun a nih avangin, Ayurveda lama hmasawnna atan hmun pawimawh tak a la nih thuai a beisei thu a sawi a, "Sorkar laipuiin kum thum liam ta aṭang khan Dhanwantari Jayanti hi National Ayurveda Day-ah a puang tawh a, he hunah hian Ayurveda pawimawhnate zir thar ila, kan ni tin nuna kan hrisel zawk nan Ayurveda hi hman ṭangkai ve i tum ang u,” a ti.

AYUSH system hmangin hriselna lama mi thiam indaih lohna phuhrûk kawngah te, damlo inenkawlna atan a ṭangkai thlai (medicinal plant) chìn intihhmuh leh lo neitute tan a eizawnna tling a nih theih dante leh, Ayurveda Panchakarma Therapy hmanga zin mi (tourist) tam tak hîp a nih theih dante Governor hian a sawi a ni.

AYUSH hi Mizoramah kum 2001 khan Health & Family Welfare department hnuai­ah din a ni a, Department of Ayurveda, Yoga and Naturopathy, Unani, Siddha and Homoeopathy (AYUSH) tihin kum 2003-ah thlak a ni. Tunah hian state sorkar hnuaiah AYUSH doctor 64 thawk mekin, regular employee 10 leh contractual staff 54 an awm a; mi 58 chu homoeopathy doctor niin, mi paruk chu ayurvedic doctor an ni.

Mizorama district hospital tinah khum 10 awmna AYUSH ward siam a ni tawh a, AYUSH OPD pawh community health centre pakua leh primary health centre pathumah siam a ni tawh bawk.