Ei leh in thianghlim zirtirna beihpui thlak

Ministry of Health hnuaia Food Safety and Standards Authority of India (FSSAI) hmalaknain nimin khan Kolasib-ah ei leh in thianghlim mipui hnena zirtirna beihpui, ‘Swasth Bharat Yatra’ (Eat right India) buatsaih a ni a, Kolasib DC Dr Arun T-in a hmanpui.

Dr Arun T chuan, natna inkai chhâwn theih loh hun a thlen mek thu sawiin, "Heng natna inkai chhawn theih loh hrang hrang - blood pressure sang, zunthlum, cancer, lung ṭha lo leh a dangte hi kan vei/tawrh chhan 90% chu nunphung hrisel loh vang, zûk leh hmuam, ei leh in uluk loh leh taksa sawizawi uar loh vangte an ni. Heng natnate hi dam/reh hlei thei lo, dam chhunga enkawl ngai a ni a, nunphung hrisel zawh a heng natnate laka lo inven chu thil finthlak leh intih hmuh chi a ni," a ti.

Swasth Bharat Yatra chu cycle rally nen India ram chhunga state tin tuam chhuak turin October 16, 2018 khan ṭan a ni a, India ram pum chu track paruka ṭhen a ni. Mizoram chu track paruknaah awmin, volunteer cyclist-te chu 1st Mizo Bn. NCC an ni a, mi 23-te'n Kolasib aṭanga Vairengte thleng cycle rally an nei dawn a ni.

Campaign-in a tum ber chu, mi tin tan ei leh in hrisel, thianghlim leh chaw paih ral mai mai loh chung­chang zirtir a ni.