Political party-te tan training buatsaih

November 28, 2018-a MLA in­thlan lo awm tur atana inbuatsaihna kal zelah nimin khan ‘Orientation Meeting with Political Parties’ buatsaih a ni a, tun hnaia Supreme Court thuchhuak zulzuiin candidate-ten nomination paper ruala an theh luh thin affidavit (Form-26) siamṭhat chung­chang inrhilhfiahna hun hman a ni.

Training dy. CEO H Lianzela'n kaihruaiin, jt. CEO Zorammuana chuan inthlan hi sorkar ta bik a ni lo a, political party ta bik pawh a ni lo tih sawiin, "Kan zavai ta a nih angin inthlan felfai neih hi mipui zawng zawng mawhphurhna a ni. Vote nei mi puitling chin tan chuan vote thlak hi an mawhphurhna pawimawh tak a ni tih hria a, vote thlak ṭheuh tur a ni," a ti.

Zorammuana chuan political party-te aiawhte chu campaign-na auhlaah khawtlang emaw hnam leh hnam inkarah emaw innghirnghona tithleng thei thil engmah sawi leh uanpui lo turin a chah a, "Tun dinhmunah chuan ECI chuan VVPAT 100 a rawn thawn mek a, chung lo thlen hunah pawh political party aiawhte nen endik vek tur a ni ," a ti a, EVM khawl hnuaia rubber inphah pawh ECI chuan a pan deuh tiin, a thuah belhna tur rubber bushing a rawn thawn mek thu a sawi.

Training-ah hian SAD dy. secretary H Lalhmingthanga chuan ‘Supreme Court Judgement on the Petition Rgarding People with Criminal Antecedents Contesting Elections’ leh ‘Amendments in Form-26 (Format of Affidavit by Candidates)’ chungchang sawifiah­in, Election dept.-a programmer H Vanlalruatfeli chuan ‘IT Applications for conduct of Elections’ thupui hmangin kumin inthlana internet hman ngaihna thil hrang hrang a sawifiah thung.

Govt. of India, Ministry of Law & Justice chuan Writ Petiiton (C) No.784 of 2015 (Lok Prahari Vs. Union of India & Others) leh Writ Petiition (Civil) No.536 of 2011 (Public Interest Foundtaion & Ors. Vs. Union of India & Anr.) chung­changa Supreme Court thuchhuak zulzuiin,candidate-ten nomination paper ruala an theh luh thin affidavit (Form-26) chu a siamṭha a ni.

Supreme Court thu avang hian candidate zawng zawngin he ammended form-26 hi hman tawh tur a ni. Supreme Court thuchhuak bawhzui hian Election Commission of India chuan uluk taka a ngaihtuah hnuah Houses of Parliament leh Houses of State Legislature inthlana candidates thubuai neite (convict cases leh pending cases, FIR pawh huam vekin) leh political party-te zawm atan kaihhruainate a siam a ni.