Transport Secretary-in 2-wheeler taxi Rate bituk aia toa tlân lo turin hriattir

Transport department chuan nimin khan Vanapa Hall-ah NEDP hnuaia Aizawl Traffic Jam Free Prog­ramme hmangin two wheeler taxi khalhtute hriat tur pawimawh hrilh­na hun an buatsaih a; Transport secretary HL Rochungnunga'n hman­puiin, rate bituk aia toa tlan lo turin two wheeler taxi-te chu a hriattir.

Transport Secretary chuan, two wheeler taxi khalhtute chu sorkarin rate a bituk kilometre khatah Rs. 20 aia tam la lo turin a hriattir a, "Rate chungchanga complaint office lama lutte hi a dik ngei a ni tih finfiah a nih chuan dan angin an chungah action lak a ni ang," a ti a; two wheeler taxi khalhtute chu an inchei dan uluk leh zual turin a chah.

Transport director Krishna Mohan Uppu pawhin thu sawiin, two wheeler taxi khalhtute chu sorkarin a man tura a siam aia tam la lo turin a hrilh a, rate an zawm loh chuan khawpui danga an tih ṭhin angin, mini-metre vuahtir hun a la awm theih thu a sawi. Driver-te chu rûi chunga an lirthei khalh lo tur leh fimkhur leh zual turin a chah bawk.

Two wheeler taxi hi Aizawlah kumin (2018) aṭang khan hman ṭan a ni a, sorkarin a lo rel tawh angin mi 500 hnenah two wheeler taxi permit pek tawh a ni. Mizoram sorkar chuan two wheeler taxi chuan man a ennawn tawh a, tlan ṭanna aṭanga kilometre khatah Rs. 20 a tuk a, kilometre khat bakah chuan km,. khat dangah Rs. 10 belh zel tur a ni.