Lirthei khalhtute hamṭhatna tur private member bill hnâwl

Nimin khan Assembly session-ah ZPM member Dr Vanlalthlana put luh Mizoram Private Transport Workers (Welfare) Bill, 2022 ngaihtuah a ni a, hnâwl a ni. Tun ṭum hi Mizoram Assembly-a private member bill a luh vawi thumna a ni.

Bill pu luttu Dr Vanlal­thlana'n bill put luh chhan hrang hrang a sawi hnuah sawiho a ni a, member 24-in an sawi. Ruling MLA zinga sawitu mi 15-in pass rih loh an duh thu an sawi a, eptu MLA pakuate'n pass an duh thu an sawi thung. Sawiho hnuah Speaker-in voice vote hmangin a bûk a, hnawl a ni ta a ni.

Bill sawihonaah ruling MLA-te chuan bill chu ṭha an tih rualin, a fel tâwk loh thu leh a famkim tawk loh avangin pass rih loh a, la ngaihtuah ṭhat leh ni se an duh thu an sawi hlawm a; eptu member-te'n an thlàwp thu leh pass ngei an duh thu an sawi thung a, a famkim lohnate chu la siamṭhat leh theih a nih thu an sawi hlawm.

ZPM Legislature Party leader Lalduhoma chuan, ruling party-in party-a an duhsak záwngte an mamawh pawh ni lo permit an pe a, anni’n an hralh leh mai mai ṭhinte thu sawiin, “Vawiina kan sawi hi chu eizawnna atana hmang tak tak driver-te chungchang a ni. Hamṭhatna buatsaihsak ila, thlamuang zawkin an awm thei dawn a ni,” a ti.

Ruling MLA-te’n Bill chu Parliament-a bill lut tawh copy-paste (entawn) nia an sawi chungchangah Lalduhoma chuan, "Municipal Bill leh Lokayukta kan pass dawn khan chu chu kan entawn a ni, kan ti a. Copy hi a zahthlak loh a, thil ṭha hi copy a ṭha. Ruling-te hian thil ṭha tak tak, copy tlak min hnutchhiah ula kan duh khawp mai,” a ti a; ruling member-te tum ber chu Bill sawichhiat a nih thu a sawi.

Lalduhoma chuan, Bill pu luttuin Mizoram tana remchang ber nia a hriat a chhawp chhuak tih sawiin, “Kan hmusit tur niin ka hre lo. Kan duhkhawp loh laite hi rules-in a chingfel vek thei. Pass duhna hi nei ila, a harsa lo,” a ti. An rorel lai chu driver tam takin an thlir tih sawiin, “An hamṭhatna tur bill lâk tlak loh kan han tite hi an tan a na khawp ang,” a ti a; pass a nih rih loh pawhin Select Committee ngaihtuah tur tala dah tura a duh thu a sawi.

House leader Zoramthanga chuan, Bill put luhna rilru chu a ṭha tih sawiin, “Driver-te hi an khawngaihthlak em mai a... driver-te duhsakna i hlan teh ang u, tih a ni a, a ṭha thlawt mai,” a ti a; chuti chung chuan pass rih loh a duh thu a sawi thung.

Zoramthanga chuan, Bill chu pawmin, a taka kalpui ni dawn se, buaithlakna a awm thu sawiin, “A ṭhat viau laiin, a system fel taka kan tih loh chuan kan buai vek dawn a ni,” a ti a; lirthei khalhtute leh neitute sum thawh tur awm chu lirthei neitute nen remruatna fel tak siam hma chuan tih chi a ni lo tih sawiin, “In pass hma hian min ráwn rawn ta che u, an tih ka ring. A thu chuan a ṭha, amaherawhchu, kan tlin lo lam a ni, ti tur an tamin ka hria. Anmahni nen sawiho hmasaka remruatpui a ngai,” a ti.

Chief Minister chuan, mi pek tura rèl thlûk a awl tih sawiin, “Mahse, a petu turte'n an tlin em, an remtihna kan la em, kan inhmin (convince) ang em, kawng hi an zawh mup mup mai lo maw? Ka thawh lo ang, an ti ngal ngal mai lo’ng maw?,” a ti.

Zoramthanga chuan, “A tum chu a ṭha, amaherawhchu, practical-a kalpui dawn hian, chiau tur kan tam khawp ang. Tuna mi hi chu a buaithlak. Ngun taka kan rel fel hunah fel zawkin rawn put luh ni se a ṭha ang. Tuna mi hi chu han pass chiah ila, a tûk aṭangin kan buai nghal ang. Tuna mi hi chu pass rih lo ang u,” tiin pawm rih loh a duh thu a sawi a ni.

Bill pu luttu Dr Vanlalthlana chuan, lirthei khalha ei zawng zingah Health Care Scheme zawm an tam thu sawiin, “Kan duh chuan health care nena link theih a ni,” a ti a; Bill-in a tum tak ngaihtuah turin member-te a ngen.

Dr Vanlalthlana chuan, Bill a put luh chu copy paste a ni lo deuh tih sawiin, “Nikum hmasa aṭang khan phek 20 chuangin ka buatsaih ve a ni. State dang tih dan ka zir chiang viauin ka hria a, ka nei kimin ka hria,” a ti a; a Bill leh Parliament-a bill lut tawh a inanga sawi chu a phat loh thu leh a pawina a hriat loh thu sawiin, “Kan ram tana ṭha tur a nih chuan copy ti loin, i pass ang u. Kimchang lo mah se a la siamṭhat theih alawm,” a ti.

Bill a buatsaih laiin lirthei khalhtu pawl hrang hrang leh mimal eng emaw zat a râwn thu sawiin, “Zir chianna mumal ka nei a, an harsatnate kan ngaithla... Inthlan dawna driver-te bàwl lam pang ngaihtuah loin ka rawn dinpui a ni,” a ti. Bill chu an pass pui thei lo a nih pawhin, Select Committee-in a ngaihtuah tur tala dah turin a ngen a, “Min pass pui thei lo a nih pawhin, session lehah ka rawn pu lut leh ang,” a ti bawk.