NABARD sum pûka sikul chei ṭhat hna a chhiat thu eptu MLA-te'n an sawi

NABARD sum cheng nuai 3,500 pûk hmanga sikul 65 sak ṭhat leh sikul 107 chei ṭhat chuan nimin khan Assembly House-ah sawi a hlawh hle. Sikul sak ṭhat leh chei ṭhat hna chu an thawh ṭhat tlangpui thu School Education minister Lalchhandama Ralte-in a sawi chu eptu MLA-te chuan an pawm lo.

Congress Legislature Party (CLP) leader Zodintluanga Ralte zawhna chhangin Lalchhandama Ralte chuan, NABARD sum pûk hmanga sikul hrang hrang sak thar leh thawm ṭhat hnathawh chu a ṭhat tlangpui thu a sawi a, "Chutih karah chuan a thawk ṭha tawk lo tlém azawng erawh an awm," a ti a; sikul sak leh chei ṭhat hna chu Lushai Engineers, CB Engineering leh Allied Concern-te'n an thawh thu a sawi.

Zodintluanga Ralte chuan, Education Minister chu minister a nih tirhah a fakawm a tih thu sawiin, "Zirtirtu ṭha tak tak a la a, lawmthu kan sawi hial a ni. Hruaitu ṭha lo hruaiin a awm rei ta em a, a zia a thlak em ni ka ti hial. Pawi ka ti khawp mai," a ti.

ZPM Legislature Party (ZLP) leader Lalduhoma chuan, sikul sak leh chei ṭhat hna a ṭha tâwk lo tih sawiin, "MZP leh MSU-te pawhin an buaipui hle," a ti a, tute nge hna thawka, eng angin nge Education Minister nen an inlaichìn tih pawh an hriat vek thu a sawi.

INC member C Ngunlianchunga chuan, Education Minister chhànna chu a pawm loh thu sawiin, "A bial chhungah ngei ngei pawh a nih tur anga hna thawh lohna a awm. Palsang leh Zohmunahte pawh a nihna tur anga thawh loh a awm a ni," a ti a, sikul sak leh chei ṭhat hna ṭha tawk lo thlalak a neihte chu Assembly Speaker hnenah a hlân.

Hetih lai hian, ruling MLA ṭhenkhatte chuan NABARD sum hmanga sikul chei ṭhat a ni chu lawmawm an tih thu leh an bial chhungah ṭha tak taka hnathawh a awm thute an sawi hlawm.

Lalchhandama Ralte chuan, member-te'n an sikul sak ṭhat leh chei ṭhat an tuipui avanga a lawm thu sawiin, "Ka bialahte INC member kalte an awm a, media kaltlangin kan thil tih kan lo hria a ni. Siamṭhat duh tak tak chuan ka hnena lo kalin lo sawi se kan welcome nen. Media leh session-a sawi kher hi hmangaihna mak tak a ni," a ti.

Department engineer-te'n sikul sak ṭhat leh chei ṭhatte endik hna an thawh mek thu sawiin Minister chuan, "Sikul 35 an tlawh tawh a, 29 ṭha tiin, paruk erawh siamṭhat ngai leh thlak ngai a awm an ti. Keimah ngeiin a nihna tur ang taka tih tur, monitoring pawh uluk tur ka ti lâwk a ni," a ti a; a nihna tur ang taka hnathawh a nih hma chuan bill pek a nih dawn loh thu a sawi.

Lalchhandama Ralte chuan a bial mite pawh dan ang taka an thawh loh chuan bill an pek dawn loh thu a hrilh tih sawiin, "Ka duh ber chu ram tana rotling siam a ni," a ti a; House member-te chu vilpui zel turin a sáwm.

INC member Lalrindika Ralte zawhna chhangin Education Minister chuan, NABARD aṭanga loan lâk chu Finance department kaltlanga tih a nih avangin a pung zat, a rulh dan tur leh a rulh hun chhung tur department hriattir an nih loh thu House a hrilh a ni.