KHAWTHLIR
Governor-in kâwm
Governor Dr Hari Babu Kambhampati chuan nimin khan ICFAI University, Mizoram hotute Raj Bhavan-ah a kâwm. Larsap chuan, high school tam takah science subject zirtirtu an awm loh avangin zirlai tam takin pawl 11 leh 12-ah science subject an la pha ṭhin lo chu pawi a tih thu a sawi. ICFAI University-ah hian zirlai 556 an awm mek a, undergraduate zirlai 89 leh post graduate zirlai 467 an ni.
Ráltlânte zirtir
Tun hnai khan Myanmar buaina avanga Lawngtlai district-a khaw hrang hrang - Kawlchaw West, Sihtlangpui, Chawntlangpui, Saikah L, Saikah U, Paithar, R Vanhne leh Rulkual khuaa ráltlante pualin dan pawimawhna inzirtirna hun buatsaih a ni. Legal awareness campaign-ah hian resource person pali an awm a ni.
HSS din belh tum lo
Nimina Assembly session-ah MNF member Zothantluanga zawhna chhangin School Education minister Lalchhandama Ralte chuan, tun dinhmunah sorkar higher secondary school 21 a awm thu leh, sorkar hnuaiah HSS din belh tumna a awm rih loh thu a sawi a, "Heng bakah hian Samagra Shiksha hnuaiah higher secondary school 22 din tawh a ni," a ti.
Rest House hawng
Hrianghmuna Sialkal Range Development Council (SRDC) Rest House sak thar chu nimin khan SRDC development officer Ngulzathuama'n a hawng. Rest House hawn inkhawm hi Hriangmun VC president Khenzakhupa'n a kaihruai a, Ngopa BDO pisaa JE H Lalrokima'n technical report a pe a ni.
DC-in kâwm
Siaha DC Lalsangliana chuan nimin khan District Rural Resource Centre-ah Siaha khawpuia sorkar pisa hotute a kawm. Lalsangliana chuan, DC office chu district-ah chuan administration kenkawhnaa fatu chan chang ni mah se, department hrang hrangte thawhpuina tel lo chuan eng mah an ti thei lo tih a sawi a, "Thawhhona ṭha nei tur chuan DC leh head of office-te hi kan inhmelhriat ṭhata kan innêl a ngai," a ti.