Mizorama beh theih nana hmalaknaah TIPM-in Mizo mipui thlawpna an ngen

Thangram Indige­n.ous Peoples’ Movement (TIPM) hruaitute chuan nimin khan Aizawl Press Club-ah thuthar thehdarhtute an kâwm a; Thangram chhunga chengte Mizorama an beh theihna atana an hmalaknaah thláwp turin Mizo mipui an sáwm.

TIPM hruaitute chuan, an páwl chu October 18, 2020-ah din a nih thu sawiin, “Thangram chhunga chengte hi Mizo hnahthlak - Hrangkhol, Chorei, Ranglong, Molsom, Kaipeng leh Sakachep-te kan ni. British lo luh hma daihin kan awm tawh. British lo luh hnuin Syhlet district-ah min dah a, chumi zawhah Cachar district-ah min dah leh a ni. Tunah hian kan duh rêng vang ni loin, Karimganj district hnuaiah kan awm ta a ni,” an ti.

Pipute huna rorelna khat hnuaia awm ṭhin chu rorelna fel lo avangin ṭhen hrana an awm thu sawiin TIPA hruaitute chuan,“Thangrama Mizo awmte hian kan unau thisen zawmpuite nena Mizoram chhung rorelna khat hnuaia awm leh kan duh ber,” an ti a; rorelna khat hnuaia awm theih nan hma la turin TIPM din a nih thu an sawi.

TIPM hruaitute chuan, November 18, 2020 khan MZP hruaitute nen Kanhmunah an ṭhukhawm tih sawiin, “Vawiin thlengin MZP-te’n hma min lakpui zel a, lawmthu kan sawi. December 10, 2020 khan Prime Minister, Union Home Minister leh Union Home Secretary-te hnenah memorundum ‘Prayer for Merging of Thangram under Mizoram State’ tih thlen a ni,” an ti.

Hma an lak chho zel thu sawiin TIPM hruaitute chuan, “Awareness campaign leh sorkar hruaitute kan dawr chhunzawm reng,” an ti a, Mizo pa mikhual inthlena min thleng ṭhintu Assembly speaker Lalrinliana Sailo chunga an lawm thu an sawi.

TIPM chuan, an movement a hlawh tlin theihna atan kawng engkima thláwp turin Mizo mipui sáwmin, “Min ṭawiawm a, ṭanpui kan ngaihna apiangah min ṭanpui turin all NGO, political party, kohhran, sorkar leh mimal kan ngen a che u. Mizote inpui Zofate Jerusalem hi belh tlakah kan ngai,” an ti a, an hmalak zelna turah Mizo mipui chunga an innghah thu an sawi.

TIPM hruaitute sawi danin, Thangram hi Kanhmun, Mamit district (Langkaih valley) leh Thinghlun, Mamit district (Singla valley) hrúla awm a ni a, square mile 180-a zau a ni.

Zawhna chhangin TIPM hruaitute chuan, movement an kalpui hnuah Assam sorkarin a ngaihsak sawt thu an sawi a, “Kawng awm lohnaahte an lâi a, kawlphethate min pe thar. Mahse, kan movement hi development beiseia kalpui kan ni lo. Kan duh ber chu kan unau Zo hnahthlakte nena rorelna khat hnuaia awm a ni,” an ti.