Sikul sak/thawm ṭhat chhui turin MPYCC-in Lokayukta an ngen

Mizoram Pradesh Youth Congress Committee (MPYCC) chuan, NABARD sum hmanga sikul sak ṭhat leh thawm ṭhatnaah eirûkna a awm nia ngaiin nimin khan chhui chiang tura ngenna Lokayukta chairman Lalsawta hnenah an thehlut.

MPYCC president Dr Lalmalsawma Nghaka chuan, School Education department-in Mizorama sikul 172 cheiṭhatna atan NABARD-ah cheng nuai 3,500 a pûk thu sawiin, “Pawisa pûk hi Mizoram hmun hrang hrangah dik lo taka hmanna leh sum tihchingpenna nasa tak a awm ngei nia kan hriat avangin chhui chhuah ngei kan duh a ni,” a ti.

MPCC Vigilance Cell-in NABARD loan hmanga sikul thawm ṭhat 15 an zir chian tawh thu sawiin Dr Lalmalsawma chuan, “Sikul 15 an zirchianna aṭang ringawt pawhin sum hman dan dik lo tam tak a awm ni ngeia a lan avangin, Mizoram puma sikul 172, NABARD loan hmanga thawm ṭhatte chu chhui chian kan duh a ni,” a ti a; sum hman dik lohnaa mawhphurtu chhui chhuak turin Lokayukta an ngen a ni.