Sorkar thuneihna chhuhsak turin Mizoram BJP-in Governor an ngen

BJP, Mizoram Pradesh chuan nimin khan Governor Dr Hari Babu Kambhampati hnenah memorandum - ‘Failure of state machinery - A request to take urgent necessary steps to supercede the Govt of Mizoram’ tih an thehlut a; Mizoram sorkar thuneihna chhuhsak turin an ngen.

Mizoram BJP hruaitute chuan nimin khan an pisaah thuthar thehdarhtute an kâwm a; BJP president Vanlalhmuaka chuan, sorkar kal dan dik lote chhuiin, dan bawhchhetute hrem an nih theih nan hma an la ṭan dawn chauh tih a sawia, “Kan sorkar hrawn mekah hian dan pawisa lotuin dan a pawisa lo chu pawi a ti lo mai ni loin, kan state-ah hian dan emaw a ti tawh zawk a ni,” a ti.

Vanlalhmuaka chuan, chief minister Zoramthanga kaihhruaina hnuaiah eirûkna, dan loa sumdawnna leh dan pawisak lohna a hluar tih sawiin, “Budget pharh hnuah kan CM-in media hmaa kan state chhunga contract hna inpek/thawh dan a sawite kha sorkar kan hrawn mek hian dan a pawisak lohzia tihlanna chiang tak a ni,” a ti a; chuvang chuan Governor hnenah memorandum an thehluh thu leh a copy chu India President, Prime Minister, Union Home Minister leh BJP National president hnenah an thawn thu a sawi.

Mizoram BJP chuan, an memorandum-ah chuan Governor chu India danpui Article 356(1) hmanga state sorkar thuneihna laksak tur leh, sorkar laipuiah Mizoram sorkar thil kalpui dan dik lote chhui chian a nih a, dan bawhchhetute hrem an nih theih nana hma la tura ngenna an ziak a ni.

BJP Memorandum ṭhenkhat
1) Kan state administration fel lo lutuk avangin mipui, ram hmasawnna leh mipui moral (chhia leh ṭha hriatna) a chhia.
2) Eirukna leh dan loa sumdawnna titute leh dan pawisa lotute an huangtau.
3) Dan kengkawhtute leh hmasawnna hnathawktute kut phuarin a awm mek.
4) Sorkar laipui thupek state sorkarin a pawisa lo.