NEUM-in an thil phûtte March 3, 2022 ral hmaa tihlawhtling turin sorkar phût

National Health Mission (NHM) Employees Union Mizoram (NEUM) chuan, sorkara an thil phût hrang hrangte March 3, 2022 ral hma ngeia tihhlawhtlinsak turin Mizoram sorkar an ngen a; March 3 ral hmaa tihhlawhtlin a nih loh chuan an kal zel dan tur an ngaihtuah dawn thu an puang.

NEUM thuchhuah chuan, theihtawp chhuahin hma an la ṭhin tih tarlangin, "Covid-19 hripuiin min chèn chilh hnuah phei chuan chawlh pawh nei mumal loin hun rei tak kan awm tawh. Mipui hriselnaa hma latu kan nih angin, ni khat chauh pawh thâ thlah thei kan ni lo tih hre chungin theihtawp kan chhuah tak meuh meuh a ni," a ti a; an mamawh sorkara an thlente chinfelsak a nih theih nan an duh aia thui kal a ngai ṭhin chu pawi an tih thu sawiin, an harsatna chinfelsak turin sorkar an ngen nawn leh a ni.

NEUM-ah hian doctor, nurse, health worker, laboratory technician, driver, data entry operator leh thawktu dangte an tel a ni.

NEUM-in sorkar an ngente
1) NHM staff tan a nih dan tur ang taka Covid-19 Free Treatment for All hman nghal kan phût.

2) Thla hnih chuang hlawh la thei loin kan awm leh mek a, March 1, 2022 hi thla thum hlawh kan lak lohna tur a lo ni leh dawn. Sorkar laipuiin NHM fund a pekte ni 21 chhunga NHM account-a lut tur a ni tih chiang taka sawi chunga Mizoramah nasa taka tihkhawtlai a ni ṭhin hi rang taka NHM account thlentir zel kan phût.

3) NEUM-te'n kan harsatna tam tak chinfel a nih theihna turin sorkarah kan thlen tawh a, thla thum chhunga report/recommendation peiha thehlut turin August 16, 2021 khan study team din a ni. Mahse, thla ruk a liam hnuah, report/recommendation pawh an peih thawkhat tawha kan hriat laiin, sorkarin April 30, 2022 thleng hun a pawhseisak nia sawi a awm leh, tun thlenga study team report sorkarin a la dawng lo hi hriatthiam harsa kan ti a; a rang thei ang bera sorkara thehluh kan phût.