A záwnin ni 34 positivity rate 20% aia sang

February 24, Ningani khan Mizoramah Covid-19 vei mi 1,057 hmuh chhuah a ni a, positivity rate chu 20.17% niin, ni 34 chhung a záwnin positivity rate 20% aia sang a ni tawh. Nimin khan hripui vei dam tawh mi 1,207 chhuahtir an ni a, mi pathum an thi.

Covid-19 vei Nilainia hmuh tharte chu mipa 456 leh hmeichhia 601 an ni a; RT-PCR hmanga hmuh 73, TrueNAT hmanga hmuh 55, RAT hmanga hmuh 912 leh FIA hmanga hmuh 17 an ni. February thla ni 24 chhungin Covid-19 positive mi 36,288 hmuh a ni tawh.

February 24-a Mizorama positivity rate chu 20.17% a ni a, ni 34 chhung a záwnin Covid-19 positivity rate 20% chung lam a ni tawh; January 22, 2022 aṭang khan ni tin positivity rate 20% aia sang vek a ni.

Nimin tlai dar 5 thleng khan hripui vei dam tawh mi 1,207 chhuahtir an ni a; district tina chhuahtir zat chu - Aizawlah mi 391, Serchhip 233, Lungleiah 105, Mamitah 101, Khawzawlah 89, Kolasib-ah 73, Lawngtlaiah 66, Champhaiah 60, Saitualah 34, Siahaah 33 leh Hnahthialah 22 a ni.

IDSP record angin, Mizoramah Covid-19 vei 2,11,310 hmuh chhuah a ni tawh a, mipa 98,859 leh hmeichhia 1,12,451 an ni a, mipa aiin hmeichhia 13,592-in an tam zawk. Nimin tlai dar 5 thleng khan mi 2,03,456 (96.28%) chhuahtir an ni tawh a, mi 655 (0.31%) thi tawhin, enkawl mek mi 7,199 (3.41%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 2,11,310 chu mi 1,000 zelah hripui vei mi 192 an awm ang a ni a; mi 1,00,000 zela Covid-19 vangin mi 59 an thi tawh ang a ni tih sorkar thuchhuakin a tarlang.

Mizoramah February 24, 2022 thlenga swab sample endik tawh 18,17,773 aṭanga positivity rate chu 11.62% a ni a; RT-PCR hmanga endik zat percentage chu 20.33 a ni a, RAT hmanga endik zat chu 73.99% a tling.