ZPM-in an candidate mi 35 an puang
Pawl hrang hrang ṭangrual pawl, Zoram Peoples' Movement (ZPM) chuan nimin khan Aijal Club-ah November 28, 2018-a Mizoram Legislative Assembly inthlanpuia an candidate turte an puang a; ZPM chief ministerial candidate Lalduhoma chu bial pahnih - Aizawl West-I leh Serchhipahte a ding dawn.
ZPM candidate puanna leh thutiam lakna inkhawm hi ZPM Val Upa Council (VUC) chairman Lalfakzuala'n a kaihruai a, Salvation Army officer Commissioner Lalkiamlova'n hunserh a hmang. Comm. Lalkiamlova chuan, ZPM candidate-te chu rinawm tura chahin, "Mihring hi a rinawm theih a, in nihna, in dinhmunah rinawm rawh u," a ti a; an bial ṭheuh hre chiang a, mirethei leh ṭanpui ngai bik an awm leh awm lohte hre chiang turin a chah.
Fuihna thu sawitu leh ṭawngṭaisaktu Rev. Robawiha chuan, ZPM candidate-te chu Pathian hminga an thutiam hre reng tura chahin, "Kan thutiamte kha Anti Defection Law aiin a nghet zawk. Thu in tiam a, a thlamuanthlak hle. In thutiam avangin thiam loh in chang tur a ni lo," a ti.
Rev. Robawiha chuan Pathian ṭih tura chahin, "Rinawm ang che u. Candidate in nihnaah, thlan tlin in niha MLA in nihnaah, sum leh paiah, ZPM-ah leh ram leh mipui tan rinawm rawh u," a ti a; kum 30 chuang Congress leh MNF party-te'n Mizoram an hruainaa mipui phunnawina khaikhawmna chu - ram hruaitute rinawm lohna a nih thu a sawi.
ZPM candidate turte hi ZPM VUC chairman Lalfakzuala'n a puang a, ZPM Steering Committee chairman Lalliansawta'n inhmelhriattirna hun a hmang. Lalliansawta chuan, tunah chuan Assembly bial 35-a an candidate turte an puang tih sawiin, "A dang kan la beisei a, Pathianin rem a tih chuan kan la puang leh thuai ang," a ti.
ZPM candidate-te hian thutiam an chham rual bakah, ziakin an nemnghet vek a; Rev. Lalzuithanga, Vanhela Pachuau leh Commissioner Lalkiamlova te hriatpuitu-ah an ṭang. VUC member Bualhranga'n rinawmna thu an tiamtir chhan a sawifiah bawk.
ZPM candidate tur puan tâk mi 35-te kum chawhrual chu 53 a ni a, a upa ber kum 72 mi niin, a naupang ber kum 30 mi pahnih an awm. Kum 60 aia upa mi 10 an awm a, kum 60 hnuai lam mi 24 an awm a ni. Thiamna lamah candidate-te chu MA leh a tlukpui mi 11, doctorate degree nei mi pahnih, theological graduate mi pahnih, graduate mi 12, under graduate mi 11 an ni a; ordained minister pakhat leh kohhran upa paruk an awm.
ZPM hian Assembly constituency no. 36-na aṭanga 40-na - Tuichawng, Lawngtlai West, Lawngtlai East, Saiha leh Palak bialahte candidate an dah rih lo a ni.