MPF nena thawhhona bawhchhiaa ngaih Party pathum hruaitute MPF-in an kâwm

Mizoram Peoples' Forum (MPF) hruaitute chuan nimin khan MPF leh political party-te Thawhhona Thuthlunga hming ziak party-te zinga Thuthlung bawhchhia an ngaih political party pathum - Congress, MNF leh BJP hruaitute an pisaah ṭheuh kal chilhin an kâwm; Thawhhona Thuthlung zâwm tur leh bawhchhe lo turin an ngen.

MPF hruaitute hian Thawhhona Thu­thlunga ruaiṭheh loh tur tih leh pawisa sem loh tur tih tarlan chu Congress, MNF leh BJP ten an bawhchhia tih report an dawng a, an chhui chian hnuah a dik ngeia an hriat avang­in political party hruaitute an kâwm ta a ni. Congress-te chu Hrangturzo biala East Lung­dar, Khawlailung leh Aizawl South-III bial chhunga Samlukhaiahte ruaiṭhehah puh an ni.

BJP-te chu R Dengṭhuama Hall-a Booth Level Workers Meet an buatsaih ṭuma sum semah puh an ni a, MNF-te chu Aizawl East-II MNF Block Conference buatsaih a nih ṭuma ruaiṭheha puh an ni bawk.

Political party pathum pisa an tlawhnaah hian MPF hruaitute chuan, MPF leh political party-te Thawhhona Thuthlung chu MPF dan siam a ni lo tih sawiin, "Political party-te nen ṭum eng emaw zat ṭhutkhawm hnuah political party-te pawhin an pawm a. Kan hmang ṭan dawn chauh a, a bawhchhiatna lam report kan dawng zel hi pawi kan ti hle a ni," an ti a; Thawhhona Thuthlung chu bawhchhe lo tura inhrilh zau zel turin party hruaitute an chah.

Thawhhona thuthlung bawhchhia­te laka MPF hmalak zel dan turah zawhnate mipui aṭanga an dawn ṭhin thu sawiin MPF hruaitute chuan, "Thawhhona Thuthlung bawhchhiate chu ram hruaitu atan an tlak dawn em ni? Thuchhuahte pawh kan nei mai dawn em ni tih ngaihdante a awm. Mahse, chutiang ema kal loh dan chu kan ngaihtuah a ni," an ti.

MPF mi leh sate pawh an fuih ve nasat ṭhin thu sawiin MPF general secretary Rev.Dr R Lalbiakmawia chuan, "Kal fawr lutuk lo tur te, ṭan lam nei lo turte leh mimal intih­hmingchhiatna awm palh thei laka inveng turin kan inhrilh ṭhin," a ti a; hmun hrang hranga MPF hruaitute chu action an lak hmaa an thil tih tumte MPF headquarters-a thehlut zel tura an hrilh thu a sawi.

Party hrang hrang pisa tlawhnaah hian MPF vice president pathum - Rev. B Sang­thanga (Mizoram Synod), Vanlalruata (CYMA president) leh RK Thanga (MUP presi­dent) te, General Secre­tary te, treasurer Lalengkimi, finance secretary Vanlal­thanga leh adviser Vanlal­rema Vantawl-te an kal.

Mizoram Peoples' Forum (MPF) hruaitute chuan nimin khan MPF leh political party-te Thawhhona Thuthlunga hming ziak party-te zinga Thuthlung bawhchhia an ngaih political party pathum - Congress, MNF leh BJP hruaitute an pisaah ṭheuh kal chilhin, Thawhhona Thuthlung zâwm tur leh bawhchhe lo turin an ngen a ni.

BJP pisaah
MPF hruaitute hi BJP pisaah kal hmasa berin, BJP state president Prof. JV Hluna hoin an lo dawngsawng a; MPF general secretary Rev.Dr R Lalbiakmawia'n inhmelhriattirna hun a hman hnuah, MPF vice president Rev. B Sangthanga'n an lên chhan a sawi.

Rev. B Sangthanga chuan, BJP-te'n Booth Level Workers Meet an buatsaih ṭumin sum an sem tih report an dawn thu sawiin, "Khualkhua aṭanga kalte pawisa pek chu thuhran a ni a, indila inpek a awm tih kan dawngi. Hei hian political party-te leh MPF inremna bakah Election Model Code of Conduct a kalh a ni," a ti.

Prof. JV Hluna chuan, R Dengṭhuama Hall-a kal khawmte chu kal man (lirthei hman man chauh) pek an tiam tih sawiin, "Pawisa sem chu sawi loh, kal man pawh kan inpe kim thei lo. Ṭhenkhat chu an lo thlen hma avangin Hawla Indoor Stadium-ah thlentír an ni a, chu'ngte chu ei tur pek an ni," a ti a; beisei aia tam an kal avangin kal man an la pe kim lo niin a sawi.
Sum sem a awm an hriat loh thu sawiin JV Hluna chuan, "Bial vil tur kan inruat vek a, anni hian an bial mi ei leh in man nei lo leh veivahnaa harsatna neite pawisa an lo pe a nih chuan kan hre lo a, keimahni pawh kan inzawtfiah ang. Kan party-ah hian bial viltu mi thar tak takte an awm a, chu'ngte chu Thuthlung hrilh ve leh pawh an ngai ang. A awm sa chuan kan hre chiang," a ti.

Mizo Hnam Rûnah
MPF hruaitute hi MNF pisa, Mizo Hnam Rûnah chuan Campaign Directorate vice chairman K Vanlalauva hoin an lo dawngsawng. Rev. B Sangthanga chuan, Aizawl East-II MNF Block inkhawmpuiah ruai an ṭheh tih an hriat thu sawiin, "Hruaitute'n bawhzui vatin, ruai an ṭheh ngeiah kan ngai," a ti a; engahmah hmaa inremna bawhchhiat chu ram hmangaihtu tih turah an ngaih loh thu a sawi.

MNF hruaitute chuan, inhriat fuh tawk loh vanga thil thleng nia niin an sawi thung a, "Kan hriat veleh kan inzawtfiah nghal a. Block hruaitu pakhatin Pu Rama a biak thu leh, party mi hlang kalkhawmna a nih chuan ruaiṭheh buatsaih a ni chu a pawina chhan tur a hriat loh thua a chhan thu a sawi a, hei hi hruaitu dangte'n MPF hruaitu Pu Lalramthanga emaw a biak tiin, thil a kal fuh lo a ni," an ti.

MNF hruaitute chuan, Aizawl East-II Block MNF hruaitute chuan, an inkhawmpui neih hun tur chu October 2017 vela an rêl tawh thu te, inkhawmpui neih a nih laiin an biala candidate tur pawh an la hriat loh thu te, an ruai buatsaih chu mipui ruai ni loin, party bil ruai a nih thute leh tuna an candidate ni sa sum hmanga buatsaih a nih loh thute an sawi.

Hetih lai hian MPF hruaitute chuan, Aizawl East-II MPF Constituency Forum hruaitute ngei pawh ruai ṭheh tura sàwm an nih thu leh in tina lûta ruai ṭheh tura an insàwm thute hrilhhriat an nih thu an sawi thung.
MNF hruaitute chuan, MPF leh political party-te Thawhhona Thu­thlung ṭha an tih thu sawiin "Ṭha taka Thawhhona Thuthlung vawn tlan hi kan duh. Thawhhona hi ram pum tana ṭha tur a ni. A aia nasaa thlirin theih­tawp chhuah zel ang che u," an ti a; a theih ang anga thawhhona thuthlung chu an mi leh sate pawh an hrilhriat reng thu an sawi.

Congress Bhavan
MPF hruaitute'n MPCC pisa Congress Bhavan an tlawhnaah general secretary RL Valla hoin an lo dawngsawng a; an kal chhan sawitu Rev. B Sangthanga chuan, "Hrangturzo biala candidate hoa zinte'n East Lungdar leh Khawlailunga party workers meet-ah ruai an buatsaih a. Mikhual ineipui satliah a ni lo tih an ran talh aṭangin a lang. Aizawl South-III bialah pawh ruaiṭheh thâwm a awm leh a, an ran talh aṭangin ruai a ni tih a chiang," a ti.

Rev. B Sangthanga sawi danin, Hrangturzo biala Khawlailungah ruai an ṭheh tih an hriat avangin, a hnua East Lungdar-a inkhawm buatsaih a nih dawnah MPF-in an ngaihven a, ṭawngka mai duh tawk loin, ziakin ruaiṭheh lo turin an chah a ni. Mahse, ruai an ṭheh luih avangin vantlang aurinna hmangin MPF chu an tlangau ta a ni.

MPCC hruaitute chuan, block conference buatsaih a nihin, khaw hrang hrang aṭanga an kalkhawm ṭhin thu sawiin, "Sawhchiar pir turte buatsaih chu a tih loh theih loh a, chutiang bak ti lo turin kan inhrilh nasa. In thil sawite hi kan lo enfiah ang a, hmalak dan turte kan lo ngaihtuah ang," an ti.