KHAWTHLIR

MZP Assembly
Mizo Zirlai Pawl (MZP) chuan nimin khan Saitualah an rorelna sang ber, General Assembly an hmang ṭan a, hmun hrang hrang aṭangin zirlai ṭhahnem tak an tel. MZP inkhawmpui thupui chu 'Mizolaite, kan ram leh hnam tan' tih a ni a; Mizoram sorkara secretary pahnih - Lalnunmawia Chuaungo, IAS leh Dr C Vanlalramsanga, IES-te khuallian an ni ang.

PRISM symbol
PRISM party chuan November 28, 2018-a Assembly inthlan awm tura an chhinchhiahna (symbol) duh thlan tur pathum an thlang a, chu'ngte chu - lunghlu (diamond), lukhum (hat) leh hampuar (balloon)-te a ni. PRISM chuan, "PRISM party chu Election Commission of India-in election symbol tur min la pek (alloted) loh avangin symbol atana duh thlan pathum neih a ngai a, hei vang hian nomination form, Form 2B Part III(c)(ii) a symbol preference-ah diamond, hat leh balloon-te dah turin candidate-te kan hriattir a ni," an ti.

Silai tun tur
Mizoram Legislative Assembly inthlanpui, November 28, 2018-a neih turah muanawm leh felfai taka vote thlak a nih theih nan Lunglei DC chuan vote chhiar ní December 11, 2018 ral hma chu silai kawl phal a ni lo tih a puang a; Lunglei district-a silai kawl zawng zawngte chu an awmna aṭanga police station/outpost hnai berah October 31, 2018 ral hmaa silai tung/thehlut vek turin a hriattir. Thupek zâwm lote chu IPC Section 188 hmanga hram an nih tur thu a tarlang bawk.

Deptt. inhmukhawm
Champhai district-a Agriculture leh leh a kaihhnawih department-te chuan thawhhona leh inpawhna ṭha zawk an neih theih nan nimin khan Champhaia LAD Picnic Spot-ah meeting an nei a, kumina an thupui ‘Together we’ll build' an zirho. Nakum 2019-a an thupui atan ‘All for the welfare of farmer’ tih an thlan nghal. He hunah hian Agriculture, AH&Vety, Horticulture, Sericulture leh Fisheries department aṭang leh ATMA, aṭangin head of department/office, technical staff leh staff dang mi 60 an tel a ni.