Dâwt thu puangzarah ZPM puh

Congress party chuan nimin khan thuchhuah siam­in, ZPM-in thu­chhuah siama Aizawl West-I constituency-ah ZPM candidate tihtlak tuma MNF leh Congress party-te ṭang dun anga an tarlang chu dâwt chiang tak niin an tarlang.

MPCC thuchhuah chuan, Congress leh MNF party-te chu khawi bialah mah an ṭang dun lo tih sawiin, "BJP nena North East Democratic Alliance (NEDA)-a thawk dun MNF-te hi Congress party chuan a thawhpui ngai dawn lo tih kan puang a ni," a ti a; ZPM chu dâwt chiang tak puangzarah puhin, an mizia dik tak an pholanga an ngaih thu a sawi.

MPCC chuan, "Congress leh BJP sangawi zawnpui MNF-te hi kan thawkho lo a, MNF zawk hian BJP an thawhpui ngei tih erawh kan sawi nawn leh duh. Tripura BJP chief minister Biplab Kumar Deb chuan a MLA leh BJP leader-te Mizorama Chakma voter tamnaah rawn campaign turin a tír tih English chanchinbuahte lo lang hian a tichiang em em a ni," an ti a; inthlan zawhah MNF leh BJP-te chu thawhho an tum a, tunah chuan Mizo mipui an hlauh vangin MNF-in a lang apauin BJP zawm angin an awm ngam lo mai niin an sawi bawk.